ირაკლი კობახიძე: ვფიქრობთ, საქართველოსთვის კანდიდატის სტატუსის მინიჭება უალტერნატივოა, ევროკავშირი ამ გადაწყვეტილებას ივნისის ბოლოს მიიღებს

ვფიქრობთ, საქართველოსთვის კანდიდატის სტატუსის მინიჭება უალტერნატივოა, ევროკავშირი ამ გადაწყვეტილებას ივნისის ბოლოს მიიღებს, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა.

მისი თქმით, პარლამენტში დაგეგმილი დღევანდელი დებატებისას ამ საკითხებზე სურს უმრავლესობას ოპოზიციისგან პასუხების მოსმენა.

„თუ ოპოზიციას მიაჩნია,რომ ქართული სახელმწიფო იმსახურებს კანდიდატის სტატუსს, ამაზე გვინდა მათი მოსაზრება მოვისმინოთ. თუ მიაჩნიათ, რომ არ იმსახურებს, ამაზე გვინდა მათი მოსაზრებები მოვისმინოთ. მნიშვნელოვანია მათგან პოზიციის დაფიქსირება, თუ რას ფიქრობენ. რა იქნება სამართლიანი ევროკავშირის მხრიდან, თითოეულ დეტალთან დაკავშირებით ძალიან მნიშვნელოვანია მათი არგუმენტების მოსმენა.

ჩვენი მხრიდან შესაბამისი კითხვებიც დაისმება, ჩვენი არგუმენტები იქნება წარმოდგენილი. ღრმად გვწამს, რომ ყველა პარამეტრით წინ ვუსწრებთ როგორც უკრაინას, ასევე მოლდოვას. არა მარტო გვწამს, არამედ ეს არის ფაქტები, რომელსაც ადასტურებს, მათ შორის საერთაშორისო ორგანიზაციების კვლევები. აქედან გამომდინარე, ვფიქრობთ, საქართველოსთვის კანდიდატის სტატუსის მინიჭება არის უალტერნატივო. ვფიქრობთ, ევროკავშირი ამ გადაწყვეტილებას ივნისის ბოლოს მიიღებს“,- განაცხადა ირაკლი კობახიძემ.