რომან გოცირიძე: იუსტიციის მინისტრს აქვს შეხება პოლიტიკურ მართლმსაჯულებასთან, მისი პარლამენტში დაბარება ლოგიკურია

კიდევ ერთი მინისტრი, რომელიც დღეს პარლამენტში მივა, იუსტიციის მინისტრი რატი ბრეგაძეა. ფრაქცია „ნაციონალური მოძრაობა“ ბრეგაძისგან ითხოვს პასუხს კითხვაზე - რა ღონისძიებები ტარდება სპეციალურ პენიტენციურ სამსახურში ბრალდებულთა (მსჯავრდებულთა) უფლებების დაცვის კუთხით და რამდენად შეესაბამება ის საქართველოს კანონმდებლობით და საერთაშორისო ხელშეკრულებებით დადგენილ სტანდარტებს. ინტერპელაცია მინისტრის მიერ კითხვებზე პასუხის გაცემის გარდა, დებატებს ითვალისწინებს. თითოეული ინტერპელაციისთვის 2 საათი და 45 წუთია განსაზღვრული.

„იუსტიციის მინისტრს აქვს შეხება პოლიტიკურ მართლმსაჯულებასთან, პოლიტიკური დევნა არის ის რასაც აღიარებს მთელი მსოფლიო, ჩვენი საერთაშორისო პარტნიორები. პოლიტიკური დევნის მაგალითი აგერ არის, სულ ბოლო ნიკა გვარამიას სახით და მანამდე მიხეილ სააკაშვილის, როგორც პოლიტიკური პატიმრის სახით. ბუნებრივია, რომ ამ შემთხვევაში მისი დაბარება იყო ლოგიკური“, - განაცხადა „ნაციონალური მოძრაობის“ წევრმა, რომან გოცირიძემ.

დღეს პარლამენტში ინტერპელაციის წესით, მთავრობის 4 წევრს, მათ შორის, პრემიერ-მინისტრს მოუსმენენ.