ნიკოლოზ ხატიაშვილი: თუ აქამდე საქართველოს სჭირდებოდა ევროპა, ახლა ევროპასაც სჭირდება საქართველო, განსაკუთრებით, იმ სტრატეგიული მიზნების გათვალისწინებით, რომლებიც ევროპას მომავლისთვის აქვს

„ჯეოქეისის“ მკვლევარმა საგარეო პოლიტიკის მიმართულებით, ნიკოლოზ ხატიაშვილმა, „ქრონიკასთან“, ბრატისლავაში გამართულ გლობალური უსაფრთხოების ფორუმზე (GLOBSEC) ისაუბრა და აღნიშნა, რომ, გეოპოლიტიკური ცვლილებებიდან გამომდინარე, დასავლეთში, განწყობები მკვეთრადაა შეცვლილი.

„GLOBSEC-იდან ძალიან პოზიტიურ განწყობით ჩამოვედი. პირადად მქონდა შეხვედრები ექსპერტებთან, ასევე, პანელებზე სხვადასხვა ქვეყნის ლიდერებს მოვუსმინე, რომლებიც ერთმნიშვნელოვნად აღიარებენ, რომ დღევანდელი გეოპოლიტიკური ვითარება რადიკალურადაა შეცვლილი და ის მოითხოვს ძალიან მკაფიო, მტკიცე ნაბიჯებს, რომლებიც ხელს შეუწყობენ ევროპის მომავალი უსაფრთხოების გაძლიერებას. რა თქმა უნდა, ამ კონტექსტში, საქართველოზეცაა საუბარი. გასაგებია, რომ, უკრაინის ომამდე, არსებობდნენ სკეპტიკური ქვეყნები, რაც ჩვენთვის დამაბრკოლებელი ფაქტორი იყო, თუმცა, უკრაინის ომმა მსოფლიო გეოპოლიტიკური ვითარება რადიკალურად შეცვალა და ვფიქრობ, რომ ამ ქვეყნების პოზიციაც, გარკვეულწილად, შეცვლილია საქართველოსთან დაკავშირებით. სწორედ ბოლოდროინდელი მოვლენების ანალიზით, შეიძლება, გვქონდეს ფრთხილი ოპტიმიზმის განწყობა და ვივარაუდოთ, რომ საქართველო ევროკავშირის წევრობის კანდიდატის სტატუსს მიიღებს, რაც ძალიან მნიშვნელოვანი იქნება არა მხოლოდ საქართველოსთვის, არამედ - მთლიანად ევროპისთვის, რადგან თუ აქამდე საქართველოს სჭირდებოდა ევროპა, ახლა უკვე შეიცვალა მოცემულობა და ევროპასაც სჭირდება საქართველო, განსაკუთრებით, იმ სტრატეგიული მიზნების გათვალისწინებით, რომლებიც ევროპას მომავლისთვის აქვს“, - აცხადებს ნიკოლოზ ხატიაშვილი.