სოზარ სუბარი გვარამიასთან დაკავშირებით ომბუდსმენის განცხადებაზე: შეიძლება სახალხო დამცველმა გააკრიტიკოს სასამართლოს გადაწყვეტილება, მაგრამ თავი დააყენოს სასამართლოს ადგილზე და მიმართოს პრეზიდენტს, მსგავსი რამ არ მახსენდება

შეიძლება სახალხო დამცველმა გააკრიტიკოს სასამართლოს გადაწყვეტილება, მაგრამ პრაქტიკულად თავი დააყენოს სასამართლოს ადგილზე და მიმართო პრეზიდენტს, მსგავსი რამ არ მახსენდება, - ასე ეხმიანება საპარლამენტო უმრავლესობის წევრი, სოზარ სუბარი „მთავარი არხის“ დამფუძნებელ ნიკა გვარამიასთან დაკავშირებით სახალხო დამცველის განცხადებას.

„შეიძლება სახალხო დამცველმა გააკრიტიკოს სასამართლოს გადაწყვეტილება, მაგრამ პრაქტიკულად თავი დააყენოს სასამართლოს ადგილზე და მიმართო პრეზიდენტს, რომ შეიწყალე, რადგან სასამართლომ თურმე უკანონო გადაწყვეტილება გამოიტანა, მე მსგავსი რამ არ მახსენდება, განსაკუთრებით იმ ეტაპზე, როდესაც სასამართლოს გადაწყვეტილება, მართალია ძალაშია შესული, მაგრამ, ორი ინსტანცია დარჩენილია - ყველა დაველოდოთ ორი ინსტანციის გადაწყვეტილებებს“, - განაცხადა სოზარ სუბარმა.

სახალხო დამცველი პრეზიდენტს ნიკა გვარამიას შეწყალების წინადადებით მიმართავს. ნინო ლომჯარია მიიჩნევს, რომ სასამართლოს გადაწყვეტილება არსებითად დაუსაბუთებელია.