პრეზიდენტი: მივმართავ ოპოზიციას, რომ შეაჩეროს დესტრუქციული ინფორმაციის მიწოდება ამ გადამწყვეტ მომენტში

მივმართავ ოპოზიციას, რომ შეაჩეროს დესტრუქციული ინფორმაციის მიწოდება ამ გადამწყვეტ მომენტში იმ მიზნით, რომ ხელისუფლების დესტაბილიზაციას მათი ძალაუფლებაში მოსვლა მოჰყვება, - ამის შესახებ პრეზიდენტმა სალომე ზურაბიშვილმა დღეს ბრიფინგზე განაცხადა.

„დღეს საკითხი სხვანაირად დგას. ვინც აიყვანა საქართველო ამ ახალ საფეხურზე, ის დაიმსახურებს ხალხის მადლიერებას და გაიმყარებს პოლიტიკურ მომავალს. დიდი იმედი მაქვს, რომ ყველანი ამას გავიაზრებთ და ერთად ვიდგებით ამ უმნიშვნელოვანეს გზაზე. მე ამ გზისთვის ჩამოვედი საქართველოში. ამ გზის გამო წავიდნენ ჩემი წინაპრები. მიზანი ის კი არ არის, რომ კიდევ უფრო მეტი ქართველი წავიდეს ევროპაში ან, როგორც ზოგი ოცნებობს, რომ მე გადავდგე და პარიზში წავიდე. მიზანი ისაა, რომ ჩვენ ყველამ აქ ერთად ვიცხოვროთ იმ ოცნების საქართველოში, რომელიც იქნება ევროპულიც და ძალიან ქართულიც“, - აღნიშნა სალომე ზურაბიშვილმა.

მან ასევე მოუწოდა ხელისუფლებას, თავი შეიკავონ ისეთი განცხადებებისგან, რომლებიც შესაძლოა ქვეყნის ევროპულ მომავალზე ნეგატიურად აისახოს.