სალომე ზურაბიშვილი: ჩვენ არ დავიწყებთ ომს ტერიტორიების დასაბრუნებლად, რადგან გვსურს ორივე მხარეს მცხოვრები მოსახლეობის გაერთიანება

საქართველოს პრეზიდენტი ბაქოს მე-9 გლობალურ ფორუმში მონაწილეობს. ფორუმის თემა „საფრთხეები და გლობალური მსოფლიო წესრიგია“. ფორუმზე სიტყვით გამოსვლისას სალომე ზურაბიშვილმა საქართველოს ოკუპირებულ ტერიტორიებზე არსებულ ვითარებას გაუსვა ხაზი.

„ჩვენ პირადად გვაქვს ნანახი საბჭოთა იმპერიის პოლიტიკის შედეგები. ჩვენ ძალიან რთული ფაქტის წინაშე ვდგავართ. კერძოდ, გვყავს ძალიან ძლიერი მეზობელი, რომელსაც არ ესმის მეზობლობა, არც მეზობლური ურთიერთობები და რომელიც არ არის მზად დიალოგისთვის და დღემდე ფიქრობს, როგორც ამას უკრაინის ომი მოწმობს, რომ შეუძლია ძალის გამოყენება კონფლიქტების გადასაჭრელად ან საკუთარი ამბიციების დასაკმაყოფილებლად. ჩვენი ქვეყნის 20% ოკუპირებულია. ჩვენ მუდმივად ვხედავთ საზღვრის გადაწევის ფაქტებს, ტყვეების აყვანას. ვხედავთ სხვაგვარ საფრთხეებს, როგორებიცაა, მაგალითად, საუბარი რეფერენდუმზე, რომელმაც შესაძლოა ამ ტერიტორიების ანექსია გამოიწვიოს.

ამას ვპასუხობთ იმ განცხადებით, რომ ჩვენ არ დავიწყებთ ომს ამ ტერიტორიების უკან დასაბრუნებლად, რადგან ჩვენ გვსურს ოკუპირებული ტერიტორიების ორივე მხარეს მცხოვრები მოსახლეობის გაერთიანება. ეს ძლიერი განაცხადია, რომელიც გავაკეთეთ, მიუხედავად იმისა, რომ ამ ოკუპირებულ ტერიტორიებზე, უკრაინაში ომის დაწყების შემდეგ ფიქრობდნენ და შიშობდნენ, რომ ჩვენ რუსეთი გამოგვიწვევდა და საქართველო ამ გარემოებებს ტერიტორიების დასაბრუნებლად გამოიყენებდა. ჩვენ ამას არ გავაკეთებთ, რადგან გვსურს გაერთიანება მოსახლეობასთან და არ გვსურს ომი. ეს არის გზავნილი რუსეთისთვისაც. ჩვენი მოვალეობაა სამხრეთ კავკასიას დავუბრუნოთ თავისი ისტორიული და სამომავლო როლი, რაც გულისხმობს უსაფრთხო, სტაბილურ ადგილს, ასევე ხიდს ევროპასთან, რომლისკენაც ჩვენ ვისწრაფვით და დღეს ძალიან მნიშვნელოვან გადაწყვეტილებას ველით ევროკომისიისგან“, - აღნიშნა პრეზიდენტმა.