ირაკლი კობახიძე: ელენე ხოშტარია ამბობს, რომ მისთვის გულის ამრევია ყველაფერი რუსული, როცა ამას ამბობს და თან რუსულ ფულს კიდებს ხელს, ეს არის ძალიან სერიოზული კითხვის ნიშნების საფუძველი

მას აქვს დამთავრებული „მგიმოს“ საერთაშორისო უსაფრთხოების ფაკულტეტი, ის არის რუსეთის საერთაშორისო უსაფრთხოების სპეციალისტი და ის მუდმივად საეჭვოდ დგას ისეთ ნაბიჯებს, რომელიც რუსეთს აძლევს ხელს, - განაცხადა პარტია „ქართული ოცნების“ თავმჯდომარემ, ირაკლი კობახიძემ „დროას“ ლიდერზე, ელენე ხოშტარიაზე საუბრისას.

„არის გარკვეული ეჭვები, რამდენად შეესაბამება ამ თანხების მოცულობა ჰონორარის არსს, ეს არის ჩასაღრმავებელი. ელენე ხოშტარია არის ადამიანი, რომელიც ამბობს, რომ მისთვის მიუღებელია და გულისამრევია ყველაფერი რუსული. გახსოვთ ყველაფერი იკადრა, როცა 80 წელს გადაცილებული პოზნერი იყო ჩამოსული, იმიტომ რომ ის იყო რუსი. როცა ერთის მხრივ ამას ამბობს, და მეორეს მხრივ რუსულ ფულს კიდებს ხელს, ეს არის ძალიან სერიოზული კითხვის ნიშნების საფუძველი. ასევე, კითხვა უნდა დაისვას, ხომ არ აქვს რაიმე კავშირი იმ ფულს, იმ აქციასთან რომლის ორგანიზატორიც ის იქნება 20 ივნისს. ეს არის აქცია, რომელსაც მართავენ ცნობილი ბაკურიანის შეხვედრის მონაწილეები, ეს არის რადიკალური ოპოზიციის აქცია, რომლის ფორმალური ორგანიზატორი არის ნაცმოძრაობის რადიკალური, ახალგაზრდული ფრთა „სირცხვილია“ და ძალიან საეჭვოა ეს დამთხვევები, რომელსაც ვხედავთ“, - განაცხადა კობახიძემ.

16 ივნისს„ქრონიკამ“ გაავრცელა ინფორმაცია, რომ „დროას“ დამფუძნებლის ოჯახის წევრის ანგარიშზე რუსეთიდან, პერიოდულად, მილიონობით რუსული რუბლი ირიცხება. მხოლოდ ბოლო სამი-ოთხი თვის განმავლობაში ელენე ხოშტარიას ოჯახის წევრის სახელზე რამდენიმე მილიონი რუსული რუბლი და ათიათასობით დოლარია ჩარიცხული, საერთო ჯამში დაახლოებით 140-დან 150 ათას დოლარამდე, საიდანაც ნაწილი ჩარიცხულია მოსკოვის დიდი თეატრის, ნაწილი კი რუსეთის ფედერალური ბიუჯეტის ანგარიშიდან.

ხოშტარიამ „ქრონიკის“ მიერ მოპოვებული სკანდალური ინფორმაცია დაადასტურა.