ილია დარჩიაშვილი: ევროკომისიამ პირველად ფორმალურად დაადასტურა, რომ საქართველოს ევროკავშირში გაწევრიანების პერსპექტივა შეუქცევადი რეალობაა და საქართველო აუცილებლად გახდება ევროკავშირის წევრი

დღევანდელი რეკომენდაციით ევროკომისიამ პირველად ფორმალურად დაადასტურა, რომ საქართველოს ევროკავშირში გაწევრიანების პერსპექტივა შეუქცევადი რეალობაა და საქართველო აუცილებლად გახდება ევროკავშირის წევრი, - ამის შესახებ ბრიფინგზე საგარეო საქმეთა მინისტრმა, ილია დარჩიაშვილმა განაცხადა.

„დღეს ევროკომისიამ გამოაქვეყნა დასკვნა საქართველოს, მოლდოვისა და უკრაინის განაცხადზე. ეს რეკომენდაცია შეიცავს მნიშვნელოვან გზავნილებს სამივე ქვეყნისთვის. დღეს ევროკომისიამ განაცხადა, რომ საქართველო, მოლდოვასა და უკრაინასთან ერთად, გაწევრიანების პერსპექტივის მიცემით ევროპული ოჯახის განუყოფელი ნაწილია. საქართველოს, გაწეული ძალისხმევის და ჩატარებული რეფორმების საფუძველზე, მართალია, ჰქონდა მეტი მოლოდინი, მაგრამ მნიშვნელოვანია, რომ ევროკომისიამ ღიად დააფიქსირა საქართველოსთვის ევროპული პერსპექტივის გახსნის შესახებ გადაწყვეტილება. ამ რეკომენდაციით ევროკომისიამ პირველად ფორმალურად დაადასტურა, რომ საქართველოს ევროკავშირში გაწევრიანების პერსპექტივა შეუქცევადი რეალობაა და საქართველო აუცილებლად გახდება ევროკავშირის წევრი“, - აღნიშნა დარჩიაშვილმა.

მისივე თქმით, საქართველოსთვის ევროპული პერსპექტივის გაჩენით, ევროკავშირმა დაადასტურა ის პროგრესი, რომელიც, ბოლო წლების მანძილზე, არსებობს საქართველო-ევროკავშირის ურთიერთობებში და კიდევ ერთხელ აღნიშნა საქართველოსთან პოლიტიკური, ეკონომიკური და ინსტიტუციური დაახლოების განსაკუთრებული მნიშვნელობა.

„გარდა ამისა, საქართველოსთვის ევროპული პერსპექტივის აღიარება იმ გეოპოლიტიკური გამოწვევების საპასუხოდ გადადგმული ნაბიჯია, რომელიც საფრთხეს უქნის მთლიანად ევროპულ ფასეულობით სისტემას, უსაფრთხოების გარემოს ევროპაში, რომლის განუყოფელი ნაწილიც საქართველოა და სწორედ ამის აღიარება მოხდა კომისიის მიერ.

ეს არის დასტური იმისა, რომ თუკი აქამდე ჩვენ „პოლიტიკურ ასოცირებასა“ და „ეკონომიკურ ინტეგრაციაზე“ ვსაუბრობდით, დღეს უკვე გადავდივართ სრულიად ახალ ეტაპზე, რასაც საქართველოს ევროკავშირში გაწევრიანების პროცესი ჰქვია. რა თქმა უნდა, ჩვენ, ევროკავშირთან შეთანხმებული ასოცირების დღის წესრიგით აღებული ვალდებულებების იმპლემენტაციის პარალელურად გავაგრძელებთ ევროკავშირთან მუშაობას საქართველოს რეფორმების ამბიციური დღის წესრიგის შესასრულებლად.

ევროკომისიის აზრი, რომელიც გახლავთ ძალიან მნიშვნელოვანი შემდგომი პროცესისათვის, ატარებს სარეკომენდაციო ხასიათს და მასზე მსჯელობას გააგრძელებს ევროპული საბჭო, რომელიც მიიღებს გადაწყვეტილებას. აქვე მინდა ვისარგებლო შემთხვევით და მივულოცო უკრაინას და მოლდოვას ევროკომისიის მიერ მიღებული გადაწყვეტილება, რომელიც მოცემულ მომენტში - ომში მყოფი უკრაინის და უსაფრთხოების კონტექსტში გამოწვევების წინაშე მყოფი მოლდოვას მდგომარეობის გათვალისწინებით, და ამ ქვეყნების წახალისების მიზნით, იყო ნამდვილად შესაბამისი ნაბიჯი ევროკომისიის მხრიდან.

აქვე დავძენ, რომ ევროკავშირში ინტეგრაციის მსურველი ქვეყნებისადმი პირობითობის სქემა სიახლეს არ წარმოადგენს. ე.წ. ცივი ომის შემდგომი გაფართოება და ინტეგრაციის შემდგომი ეტაპები, მათ შორის, დასავლეთ ბალკანეთის მიმართულებით, სწორედ პირობითობის სქემებზეა დაფუძნებული. ჩვენ მზად ვართ, ამ მხრივ ვიმუშაოთ პარტნიორებთან, საქართველოს წარმატებული ინტეგრაციის პროცესის იმპლემენტაციის და საბოლოო გაწევრიანების მიზნით.

საქართველოს, მოლდოვას და უკრაინას დღეს აქვთ შესაბამისი პოზიციები მომავალში ევროკავშირთან გაწევრიანების მოლაპარაკებების დასაწყებად. ამ მნიშვნელოვან ეტაპამდე მისასვლელად საქართველოს ისევე, როგორც მოლდოვასა და უკრაინას ევროკავშირმა წარუდგინა პირობები, რომელთა დაკმაყოფილების შემდეგ თითოეული ქვეყანა მზად იქნება მოლაპარაკებების დასაწყებად“, - განაცხადა დარჩიაშვილმა.

ევროკომისიის პრეზიდენტმა, ურსულა ფონ დერ ლაიენმა პრესკონფერენციაზე განაცხადა, რომ რეკომენდაციას უწევეს საბჭოს, საქართველოს მიანიჭოს ევროპული პერსპექტივა და შემდეგ კანდიდატის სტატუსის მინიჭებამდე პირობების შესრულება შეფასდეს.