არჩილ თალაკვაძე: როდესაც საარჩევნო ყუთის გვერდის ავლით გინდა რაღაცას მიაღწიო, სწორედ ეს ზრდის პოლარიზაციას, დეზინფორმაცია, უმძიმესი ცილისწამებები ზრდის პოლარიზაციას

ყველა პოლარიზაციას აქვს ორი მხარე, როდესაც ერთმა მხარემ გადადგა ნაბიჯები, თუ მეორე მხარეს არ სურს პოლარიზაციის დასრულება, მაშინ ეს პოლარიზაცია ვერ დასრულდება, - ამის შესახებ საპარლამენტო უმრავლესობის წევრმა, არჩილ თალაკვაძემ „ქრონიკასთან“ განაცხადა.

მან ისაუბრა იმ კონკრეტულ ნაბიჯებზე, რაც ხელისუფლებამ პოლარიზაციის შემცირების მიმართულებით გადადგა.

„პოლარიზაციის შემცირების მიმართულებით, სწორედ ხელისუფლებამ, ჩვენ გადავდგით არსებითი ნაბიჯები, და რა იყო ეს არსებითი ნაბიჯები: ჩვენ შევცვალეთ კონსტიტუცია და მივიღეთ ეროვნულ ღირებულებებზე დაფუძნებული ევროპული ტიპის კონსტიტუცია, სადაც სახელისუფლებო შტოები ერთმანეთს აბალანსებენ და არის გამიჯნული ის ძალაუფლება, რაც წინა ხელისუფლების პირობებში აბსოლუტურად ერთ ვერტიკალში იყო კონცენტრირებული; ჩვენ შევცვალეთ საარჩევნო კანონმდებლობა ისე, რომ პოლიტიკა ქუჩიდან პარლამენტში გადასულიყო და მეტ ოპოზიციურ პარტიას ჰქონოდა შესაძლებლობა საპარლამენტო არენა გამოეყენებინა, საპარლამენტო პოლიტიკაში ჩართულიყო; ჩვენ შევცვალეთ კანონი, რომ ოპოზიციურ პარტიებს მიეღოთ რეალური დაფინანსება; ჩვენ შევცვალეთ კანონი, რომ ოპოზიციას მიეღო წვდომა მედიაზე, ჩვენ გავაკეთეთ მედიის დივერსიფიკაცია ისე, რომ დღეს ყველა ხმა ისმის ქვეყანაში. ფაქტია, რომ დღეს, 20-ზე მეტი ტელევიზია მთელი ქვეყნის მასშტაბით აშუქებს მოვლენებს და 120-ზე მეტი მედია აშუქებს რეგიონებში მოვლენებს; ჩვენ ასევე გადავდგით სხვა მნიშვნელოვანი ნაბიჯები, ეს არის მოლაპარაკებები, რომელიც გავმართეთ და დავხურეთ ოპოზიციასთან შეთანხმებით, მიუხედავად იმისა, რომ ბევრი ოპოზიციური პარტია იყო „ნაცმოძრაობის“ რადიკალურ ბანაკში და მათი შანტაჟის ქვეშ იღებდა პირველი თვეები გადაწყვეტილებებს, ჩვენ მაინც შევძელით და დავხურეთ ეს მოლაპარაკებები წარმატებით.

შემდეგ არის უკვე ის ნაბიჯები, რომელიც უნდა გადადგას ოპოზიციამ, იმიტომ რომ ყველა პოლარიზაციას აქვს ორი მხარე, როდესაც ერთმა მხარემ გადადგა ნაბიჯები, თუ მეორე მხარეს არ სურს პოლარიზაციის დასრულება, მაშინ ეს პოლარიზაცია ვერ დასრულდება. რა ხდებოდა მეორე მხარეს და რა ხდება დღეს: ხდებოდა ის, რომ ჩატარებული საპარლამენტო არჩევნების მერე, როცა უნდა გვქონოდა პლურალისტური, დაბალანსებული პარლამენტი, ჩვენ მივიღეთ ოპოზიციის მხრიდან პასუხად 7-თვიანი საბოტაჟი. როდესაც მოლაპარაკებები უნდა შეესრულებინათ, ხელი მოეწერა ოპოზიციას, ოპოზიციის დიდმა უმრავლესობამ ხელი არ მოაწერა, არ შეუერთდა ამას, როცა ევროპულ კონსტიტუციას ვამტკიცებდით, კენჭისყრაში არ მიიღო მონაწილეობა, გუშინწინ ევროკომისიამ გვითხრა რომ პოლარიზაცია შეამცირეთ, ესაა ნომერ პირველი და ვხედავთ, რომ დღეს არის აქცია, რომლის როგორც ცენტრალური მესიჯი და მთავარი მიზანი გაჟღერდა უკვე (სააკაშვილმა გააკეთა განცხადება, მელიამ, მთელმა ქუჩის პოლიტიკოსებმა გააკეთეს განცხადებები. ხალხს ეუბნებიან, რომ მოდით, ევროპის იდეისთვის შევიკრიბოთო, მაგრამ, მეორე მხარეს ამბობენ, რომ ნუ გექნებათ იმედი, რომ ამ ერთი აქციით შევცვლით ხელისუფლებასო. ანუ ეს აქცია ევროპისთვის კი არ არის, ხელისუფლების შესაცვლელად არის არჩევნების გარეშე, საარჩევნო ყუთის გვერდის ავლითო. როდესაც საარჩევნო ყუთის გვერდის ავლით გინდა რაღაცას მიაღწიო, სწორედ ეს ზრდის პოლარიზაციას, როდესაც დეზინფორმაციას ავრცელებ, ეს ზრდის პოლარიზაციას, როდესაც მედია გყავს პირდაპირ პარტიის პრესსამსახურად და როდესაც უმძიმეს ცილისწამებებს ვისმენთ, როგორც პოლიტიკაში, ისე საზოგადო ცხოვრებაში, ეს ზრდის პოლარიზაციას“, - განაცხადა თალაკვაძემ.