ირაკლი კობახიძე: თუ სადმე გვაქვს უკუსვლა, ერთადერთი ეს არის ის, რომ ვერაფრით ვეღირსეთ ჯანსაღ, ევროპულ, პროდასავლურ ოპოზიციას საქართველოში

აღარ ვიცით რა გავაკეთოთ იმისათვის, რომ ერთი ნაბიჯი მაინც გადადგათ დეპოლარიზაციისკენ, რა გავაკეთოთ, ჩვენ რა ნაბიჯი გადავადგათ, ვის შევჩივლოთ, აკერმანი მკვდარია,- ამის შესახებ პარტია „ქართული ოცნების“ თავმჯდომარემ ირაკლი კობახიძემ პარლამენტში სიტყვით გამოსვლისას „ნაციონალური მოძრაობის“ მისამართით განაცხადა.

მანვე აღნიშნა, რომ რადიკალურ ოპოზიციას არაფერი აქვს საერთო ევროპასთან და ისინი ვერანაირ წვლილს ვერ შეიტანენ საქართველოს ევროპულ პერსპექტივაში.

„ევროკავშირის დოკუმენტის გამოცემის პირველივე წუთიდან ოპოზიციის რადიკალური ნაწილი არღვევს პირველივე მოთხოვნას. ეს არის ერთადერთი პუნქტი, რომელიც ოპოზიციამ უნდა შეასრულოს თუმცა, პირველ რიგში ამ პუნქტს არ ასრულებს და ყველაფერს აკეთებს იმისათვის, რომ კიდევ უფრო გააღრმაოს პოლარიზაცია, დაპირისპირება, მღელვარება საზოგადოებაში თუმცა, ვიტყოდი, რომ ეს არის კიდევ ერთი წარუმატებელი მცდელობა, რომელსაც ისინი ამჟამად ახორციელებენ. არ ვიცით რა უნდა გავაკეთოთ იმისათვის, რომ ქვეყანას გავუფრთხილდეთ. ჩვენ მაქსიმალურად, ხანდახან ვეფერებით ხოლმე კრიმინალებს, პირდაპირ ვიტყვი, იმ ოპოზიციას, რომელსაც აქვს კრიმინალური წარსული და არა მარტო წარსული, აწმყო და მომავალი. როდესაც საუბარი გვაქვს „ნაციონალურ მოძრაობაზე“, მის დანაყოფებზე, სატელიტებზე ეს არის მთავარი რაც უნდა გავიაზროთ, რომ ამ პოლიტიკურ ძალასთან არის დაკავშირებული რისკები ჩვენი ქვეყნისთვის. აქედან გამომდინარე, უნდა ვიყოთ ძალიან ფხიზლად და ფრთხილად, ბუნებრივია, მათი თითოეული ნაბიჯის მიმართ ჩვენ უნდა გვქონდეს სათანადო დამოკიდებულება. აღარ ვიცით რა გავაკეთოთ იმისათვის, რომ ერთი ნაბიჯი მაინც გადადგათ დეპოლარიზაციისკენ, რა გავაკეთოთ, ჩვენ რა ნაბიჯი გადავადგათ, ვის შევჩივლოთ, აკერმანი მკვდარია, თქვენი ტრენერი. ცხონებულის მიმართ, არანაირი პრეტენზიები არ გვაქვს, ფული გადაუხადეთ და გატრენინგებდათ „წალეკვაში“. სიტყვა, რომელიც 20 ივნისის აქციაზე დააანონსა თქვენი ახალგაზრდული ფრთის წარმომადგენელმა, მაგრამ თქვენ რომ მონაწილეობდით ამ გეგმის შედგენაში, ეს კიდევ ერთხელ მოწმობს იმას, რომ „ნაციონალური მოძრაობა“ არის დანაშაულებრივი პოლიტიკური ძალა თავისი კუთვნილი პარტიებით, ტელევიზიებით და „ენჯეოებით“. ამას რა თქმა უნდა, სჭირდება სათანადო პასუხის გაცემა. თქვენ არაფერი გაცხიათ ევროპის, არანაირად არ გავხართ თქვენ ევროპას რაც კიდევ ერთხელ დაადასტურეთ დღევანდელ სხდომაზე თქვენი დამოკიდებულებით. პრემიერი საუბრობდა ჩვენს პერსპექტივაზე და მაშინვე გამოავლინეს უკულტურობა, ჩაეჭრნენ პრემიერს და სცადეს მოეწყოთ ობსტრუქცია. ეს არის თქვენი ევროპული კულტურა, ამიტომ ვამბობ, რომ თქვენ არაფერი გცხიათ ევროპულობის და ვერავითარ წვლილს ვერ შეიტანთ ჩვენს ევროპულ პერსპექტივაში. ეს არის ძალიან სამწუხარო მოვლენა, ქვეყანას სჭირდება ჯანსაღი ოპოზიცია, თუმცა, თუ სადმე გვაქვს უკუსვლა, ერთადერთი ეს არის ის, რომ ვერაფრით ვეღირსეთ ჯანსაღ, ევროპულ, პროდასავლურ ოპოზიციას საქართველოში“,- განაცხადა ირაკლი კობახიძემ.