სამინისტრო: დემირელის კოლეჯის მასწავლებლები და მოსწავლეები სხვა სკოლებში გადანაწილდებიან

განათლების სამინისტრო დემირელის კოლეჯის მასწავლებლებსა და მოსწავლეების საგანმანათლებლო დაწესებულებაში გადაანაწილებს.

„დემირელის კოლეჯს ჰქონდა დარღვევები, თუმცა ამავდროულად ჰყავდა ძალიან კარგი მოსწავლეები და კომპეტენტური მასწავლებლები. ჩვენ ყველა პირობას შევქმნით, რომ მათი სხვა სკოლებში გადანაწილების პროცესი მაქსიმალურად უმტკივნეულოდ წარიმართოს. რამდენიმე კერძო სკოლასთან ვაწარმოებთ მოლაპარაკებებს, მათ უკვე გამოთქვეს მზაობა, რომ მიიღონ დემირელის კოლეჯის მოსწავლეები და მასწავლებლები. გადაწყვეტილების შესახებ საზოგადოებას უმოკლეს პერიოდში ვაცნობებთ,“ - აღნიშნა განათლების სამინისტროს პრესსამსახურის ხელმღვანელმა ნატა ასათიანმა. 

სამინისტროს ინფორმაციით, მასწავლებლების და მოსწავლეების მიღებასთან დაკავშირებით მზაობა რამდენიმე სკოლამ უკვე გამოთქვა.

თბილისში დემირელის სახელობის კერძო სკოლა დაიხურა. როგორც "იმედის" ჟურნალისტს სკოლის დირექტორმა განუცხადა, სასწავლო წლის დაწყებას დაწყებას 300-ზე მეტი მოსწავლე ელოდებოდა. დემირელის სკოლის დირექტორი ამ ეტაპზე თავს იკავებს წინასწარი შეფასებებისგან, თუ რა გახდა რეალურად სკოლის დახურვის მიზეზი, თუმცა ამბობს, რომ მთელი წელი ამაზე საუბარი. ის წუხილს გამოთქვამს, რომ სკოლა, რომელიც პრემიერმა სამ საუკეთესო სკოლათა შორის დაასახელა,  ასე მარტივად დაიხურა.

როგორც „იმედისთვის“ გახდა ცნობილი, დემირელის სკოლის მოსწავლეები და მშობლები 5 სექტემბერს განათლების სამინისტროსთან მასშტაბურ აქციას გამართავენ.

დემირელის სკოლის მენეჯერი მუსტაფა ემრე ჩაბუქი საქართველოში 24 მაისს დააკავეს. დემირელის კოლეჯის ხარისხის მართვის მენეჯერს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მას ბრალად შეიარაღებული ტერორისტული ორგანიზაციის წევრობა ედება.