გიორგი ვოლსკი: ოპოზიცია პროგრამებით უნდა დაუპირისპირდეს მმართველ გუნდს და გაიმარჯვოს საზოგადოების ნდობით და არა რევოლუციით

ოპოზიცია თავისი პროგრამებით უნდა დაუპირისპირდეს მმართველ გუნდს და გაიმარჯვოს საზოგადოების ნდობით და არა რევოლუციით,- ამის შესახებ საპარლამენტო უმრავლესობის წევრმა გიორგი ვოლსკიმ „ქრონიკის“ ეთერში ისაუბრა.

მისი თქმით, ოპოზიციამ უნდა ისარგებლოს არსებული პროექტებით, წარმოადგინონ თავიანთი პროექტი და ხალხის ნდობის მანდატი ამით მოიპოვონ.

„არავის ჰგონია, რომ ბიძინა ივანიშვილის გარეშე არ ხდება მნიშვნელოვანი და საკვანძო გადაწყვეტილების მიღება. მათ ზუსტად იციან, რომ არსებობს ირაკლი ღარიბაშვილი, კობახიძე თუ მთლიანად გუნდი. ნებისმიერი დარგი აიღეთ, შეიძლება შეცდომებია, გადაცდომები, რაზედაც უნდა იყოს ორიენტირებული პოლიტიკური პარტია. თავისი პროგრამებით უნდა დაუპირისპირდეს მმართველ გუნდს და გაიმარჯვოს საზოგადოების ნდობით და არა რევოლუციით. „კუბილიუსებმა“ ზუსტად იციან, რომ ეს ასე არ არის, ხელისუფლებას აქვს საკმაო ინტელექტუალური რესურსი და შედეგები გინდა ევროინტეგრაციის და გინდა ინფრასტრუქტურული პროექტების განხორციელების მიმართულებით. შედეგი სახეზეა, საქართველო დემოკრატიული ქვეყანაა, ევროპაა, აბა ნებისმიერ ტურისტს, ვინც არ ერკვევა პოლიტიკაში ჰკითხეთ, შეაფასონ გინდ მომსახურების სფერო, ინფრასტრუქტურა, ტურიზმის სფერო. პრობლემა იმაშია, რომ თუკი ბიძინა ივანიშვილის აშენებულია ის სასტუმრო „პარაგრაფი“ და დენდროლოგიური პარკი, ამ ადამიანებს არ სიამოვნებთ, რომ იქ მივიდნენ, არ მივლენ არასდროს. ოპოზიციის დამრიგებლად ვერ გამოვალ აქ, მაგრამ ისარგებლონ იმით, რა პროექტებიც კეთდება - გინდ აბასთუმანი, წყალტუბო ან სხვა და შენი პროექტი წარმოადგინე, მოაწონე, მიიღე ხალხისგან ნდობის მანდატი და გაიმარჯვე არჩევნებში და ბიძინა ივანიშვილი პროექტებს რომ აკეთებს, გაარძელებს ამის კეთებას და ბოლომდეც მიიყვანს ამას“,- აღნიშნა ვოლსკიმ.