ირაკლი კობახიძე: თუ ვინმეს მხრიდან მოსამართლეზე ზეწოლის რისკი არსებობს, ამას შესაბამისი რეაგირება სჭირდება - მათ შორის, შეიძლება, ამას საკანონმდებლო რეაგირებაც დასჭირდეს

„თუ ვინმეს მხრიდან მოსამართლეზე ზეწოლის რიკი არსებობს, რა თქმა უნდა, ამას შესაბამისი რეაგირება სჭირდება. მათ შორის, შეიძლება, ამას საკანონმდებლო რეაგირებაც დასჭირდეს. თუმცა, ეს ძალიან ზოგადი იდეაა და რა შეიძლება, ამაში იგულისხმებოდეს, შეიძლება, მომავალი განხილვის საგანი გახდეს“, - განაცხადა „ქართული ოცნების“ თავმჯდომარემ, ირაკლი კობახიძემ ჟურნალისტებთან, მოსამართლე ლაშა ჩხიკვაძის განცხადებაზე დასმული კითხვის პასუხად.

მისივე თქმით, ლოგიკურია, როდესაც მოსამართლე ზეწოლისგან თავს იცავს.

„ჩვეულებრივი მოვლენაა, რომ სასამართლო ზეწოლისგან თავს იცავს. ამას ვერავინ დაარქმევს ვინმეს წინააღმდეგ კამპანიას. თუ სასამართლოზე ზეწოლა ხორციელდება და სასამართლო ამისგან თავს იცავს, ეს აბსოლუტურად ჯანსაღი მოვლენაა. სასამართლო ერთ-ერთი ინსტიტუტია, რომელსაც მოსამართლეები წარმოადგენენ. როდესაც ისინი თავს იცავენ, ეს ჩვეულებრივი, ლოგიკური გაგრძელებაა“, - განაცხადა ირაკლი კობახიძემ.

მოსამართლე ლაშა ჩხიკვაძის განცხადებით, ნიკა გვარამიას საქმეზე განაჩენის გამოცხადების შემდეგ, სასამართლოს შენობაში აშშ-ის საელჩოს თანამშრომელი შეხვდა, რომელმაც უთხრა, ელჩს აინტერესებს, რატომ გამოიყენა თავისუფლების აღკვეთის ზომა.