სანდრო რაქვიაშვილი „ქართული ოცნებიდან“ წასული დეპუტატების მიერ მოძრაობის დაფუძნების გეგმაზე: არ მგონია, რომ ამას რაიმე მომავალი ჰქონდეს

„გირჩის“ წევრი სანდრო რაქვიაშვილი „ქართული ოცნებიდან“ წასული დეპუტატების გეგმას, საზოგადოებრივი მოძრაობა შექმნან, სკეპტიკურად უყურებს და ამბობს, რომ ეს „ცუდად დადგმული სპექტაკლია“.

„არ მგონია, რომ ეს სერიოზული ამბავია. მე მგონია, რომ ეს რაღაც ცუდად დადგმული სპექტაკლია. უბრალოდ, „ქართული ოცნების“ წევრები არიან, რომლებიც რაღაცას ლაპარაკობენ, რაც „ქართული ოცნების“ ფორმალური წევრობის პირობებში არ შეეძლოთ. ჩემი აზრით, ეს პოლიტიკა არ არის, ეს რაღაც უაზრო თამაშია, არ მგონია, რომ ამას რაიმე მომავალი ჰქონდეს. ძალიან მაინტერესებს, რა სახელს აირჩევენ“, - აცხადებს სანდრო რაქვიაშვილი.

საზოგადოებრივი მოძრაობის დაფუძნების შესახებ, გუშინ, 27 ივლისს, დამოუკიდებელმა დეპუტატმა, მიხეილ ყაველაშვილმა სოციალურ ქსელში დაწერა.

დღეს, გურამ მაჭარაშვილმა, „ქართული ოცნების“ დატოვების შესახებ განაცხადა. ის სუბარის, ხუნდაძის და ყაველაშვილის გუნდს შეუერთდება.