დემირელის კოლეჯის დირექტორი: თამარ სანიკიძემ არასწორი ინფორმაცია გაავრცელა

დემირელის კოლეჯის დირექტორი ნინო კავთიაშვილი განათლების ხარისხის განვითარების ეროვნული ცენტრის დირექტორს თამარ სანიკიძეს არასწორი ინფორმაციის გავრცელებაში სდებს ბრალს. კავთიაშვილის თქმით, თამარ სანიკიძემ მედიასაშუალებებთან აღნიშნა, რომ მან სანიკიძესთან შეხვედრაზე დემირელის სკოლის დამფუძნებლების მხრიდან ზეწოლაზე ილაპარაკა.

"2017 წლის 29 აგვისტოს ზოგადსაგანმანათლებლო დაწესებულების ავტორიზაციის საბჭომ დემირელის სახელობის კერძო კოლეჯს უარი უთხრა ავტორიზაციის მინიჭებაზე. აღნიშნულ უარს მოჰყვა მასმედიის სხვადასხვა საშუალებით ავტორიზაციის საბჭოს წევრების კომენტარები, რომლებიც რიგ შემთხვევაში სრულიად დაუსაბუთებელი და გაუმართლებელია. 31 აგვისტოს განათლების ხარისხის განვითარების ეროვნული ცენტრის დირექტორმა ქალბატონმა თამარ სანიკიძემ მედიასაშუალებებით გაავრცელა არასწორი ინფორმაცია საბჭოს სხდომის მიმდინარეობისა და ჩემ მიერ გაკეთებულ განცხადებებთან დაკავშირებით. სხვადასხვა სააგენტოსა და ტელევიზიისთვის მიცემულ ინტერვიუში თამარ სანიკიძე აღნიშნავდა, თითქოს მე გავაკეთე განცხადება სკოლის დამფუძნებლების მიერ განხორციელებულ ზეწოლასთან დაკავშირებით, კერძოდ მან აღნიშნა: 

"საბჭოს სხდომაზე სკოლის დირექტორმა პასუხისმგებლობის გაზიარების ნაცვლად დამფუძნებლებზე მიუთითა, რომლებიც უხეშად ერეოდნენ სკოლის საქმიანობაში და დირექტორს აიძულებდნენ ხელი მოეწერა გაყალბებულ დოკუმენტაციაზე". ეს განცხადება არ შეესაბამება სინამდვილეს და მისი გადამოწმება შესაძლებელია ავტორიზაციის საბჭოს სხდომის ოქმის ჩანაწერების საშუალებით. 

საბჭოს სხდომაზე მე განვმარტე, თუ როგორ ხდება სასწავლო წლის საერთო სტრატეგიის შემუშავება სკოლის დამფუძნებლების მიერ. ეს არასწორი ინფორმაცია უხეშად ლახავს ჩემს პატივსა და ღირსებას. აქვე აღვნიშნავ, რომ დემირელის სახელობის კოლეჯის დირექტორის თანამდებობაზე დავინიშნე 2016 წლის ოქტომბერში, მას შემდეგ რაც უცხოელი მოსწავლეები უკვე სწავლობდნენ კოლეჯში და დაწყებული იყო განათლების აღიარების პროცესი, რომელსაც თავად განათლების ხარისხის განვითარების ეროვნული ცენტრი ახორციელებს განათლების სამინისტროთან ერთად", - წერია ნინო კავთიაშვილის განცხადებაში.

თბილისში დემირელის სახელობის კერძო სკოლა 30 აგვისტოს დაიხურა. სასწავლო წლის დაწყებას დაწყებას 300-ზე მეტი მოსწავლე ელოდებოდა.

31 აგვისტოს განათლების ხარისხის განვითარების ცენტრში, თამარ სანიკიძესთან შესახვედრად, დემირელის კოლეჯის მოსწავლეების მშობლები მივიდნენ.

შეხვედრის დასრულების შემდეგ თამარ სანიკიძემ ჟურნალისტებს განუცხადა: "სკოლის დირექტორმა განაცხადა, რომ არ იზიარებს პასუხისმგებლობას და მიუთითებს დამფუძნებელზე, რომელიც უხეშად ერეოდა სკოლის საქმიანობაში. სწორედ ისინი აიძულებდნენ მას, რომ ხელი მოეწერა გაყალბებულ დოკუმენტაციაზე, რომელიც ემსახურება განათლების აღიარებას ძალიან ბევრი მოსწავლისთვის".