გივი მიქანაძე: ვენეციის კომისიის დასკვნა ძალიან ბევრ კითხვას აჩენს - ჩვენ წარვადგინეთ კანონპროექტი, რომელიც საჭიროებებსა და ევროპულ პრაქტიკაზეა მორგებული

„ჩვენ წარვადგინეთ კანონპროექტი, რომელიც საჭიროებებსა და, რაც მთავარია, ევროპულ პრაქტიკაზეა მორგებული“, - ასე უპასუხა საპარლამენტო უმრავლესობის წევრმა, გივი მიქანაძემ, „ქრონიკასთან“ საუბრისას, მოსმენებთან დაკავშირებულ კანონპროექტზე ვენეციის კომისიის მოსაზრების შესახებ დასმულ კითხვას.

გივი მიქანაძის თქმით, კომისიის დასკვნა კითხვის ნიშნებს აჩენს.

„ნიშანდობლივი და ძალიან საყურადღებოა, რომ ვენეციის კომისიის დასკვნა, რომელზეც ჩვენი ოპონენტები და რიგი სამოქალაქო სექტორის წარმომადგენლები ცდილობენ, წარმოაჩინონ, რომ თითქოს, ყველაზე კრიტიკული დასკვნაა და რაღაც პრობლემებს ეხება, სამართლებრივ კონტექსტთან უშუალობაში არ შედის. ამასთანავე, აღსანიშნავია, რომ ამ დასკვნაში ადამიანის უფლებათა ევროპული სასამართლოს არცერთი პრეცედენტული გადაწყვეტილება მოყვანილი არ არის. შესაბამისად, ჩვენ ძალიან ბევრი კითხვა გვიჩნდება. მითუმეტეს, კითხვები ჩნდება მას შემდეგ, რაც, როდესაც Twitter-ზე ეს პოზიცია იყო წარმოდგენილი და „ლინკი“ საერთო სასამართლოების შესახებ კანონთან მიმართებაში გადადის. ასევე, ისიც უნდა აღინიშნოს, რომ ინსპექტორის სამსახურთან დაკავშირებით, გარკვეული კრიტიკა მოვისმინეთ ამ დასკვნაში, რომელიც არსებითად, წარდგენილი კანონპროექტის განხილვის საგანიც კი არ იყო. ამიტომ, ძალიან ბევრი კითხვის ნიშანი ჩნდება. წარმოდგენილი პოზიცია ბევრ კითხვის ნიშანს მოიცავს. ამასთანავე, უნდა აღინიშნოს, რომ არაერთი შეხვედრა გაიმართა ოპოზიციისა და სამოქალაქო სექტორის წარმომადგენლობით და არცერთი არგუმენტირებული შემხვედრი პოზიცია, რომლებიც სამართლებრივ საკითხებს უკავშირდება, მათ არ წარმოუდგენიათ“, - განაცხადა გივი მიქანაძემ.