ირაკლი კობახიძე უარყოფს ინფორმაციას კონსტიტუციის პროექტში ჩასწორების შესახებ

პარლამენტის თავმჯდომარემ ირაკლი კობახიძემ ბიუროს სხდომაზე განცხადება გააკეთა საკონსტიტუციო ცვლილებების პროექტთან დაკავშირებით და უარყო გავრცელებული ინფორმაცია, რომ პროექტში რამდენიმე საკითხი ჩაასწორეს. 

„კანონპროექტთან დაკავშირებით დღეს გავრცელდა გარკვეული დეზინფორმაცია, პარლამენტის ვებ-გვერდზე გამოქვეყნებულია დოკუმენტის პროექტი, რომელიც საქართველოს პარლამენტის მიერ მეორე მოსმენით არის მიღებული. დეზინფორმაცია ეხებოდა იმას, რომ თითქოს გარკვეული საკითხები არის ჩასწორებული კონსტიტუციაში, განსხვავებით მეორე მოსმენით დარიგებული დოკუმენტისგან. სინამდვილე არის შემდეგი - რა თქმა უნდა, ოთხი ცვლილება არის შეტანილი დოკუმენტში. ბუნებრივია, ეს დოკუმენტი განსხვავდება მეორე მოსმენით განხილვის დროს დარიგებული ვარიანტისგან. ოთხივე ცვლილება პროექტში შეტანილია იმ შენიშვნების მიხედვით, რომელიც პლენარულ სხდომაზე გამოითქვა. ერთი ტექნიკური ცვლილება ეხება ღირსების უფლების შესახებ მუხლის სათაურს; მორიგი შენიშვნა ეხებოდა ჯანმრთელობის დაცვის უფლებას და ფორმულირების დახვეწას; ასევე, შეიცვალა ფორმულირება, რომელიც ეხებოდა იუსტიციის უმაღლესი საბჭოს თავმჯდომარის არჩევის წესს, რომ დაკონკრეტებულიყო ორგანული კანონის დათქმა; მეოთხე საკითხი, რომელიც იყო გაზიარებული, ეხებოდა პრეზიდენტის არჩევას 6 წლის ვადით. ეს არის გარდამავალ დებულებებში ასახული შესაბამისი ნორმა. ეს იყო ოთხი შენიშვნა, რომელიც გამოითქვა პლენარულ სხდომაზე და გაზიარებულ იქნა ჩემ მიერ, როგორც მომხსენებლის მიერ. მხოლოდ და მხოლოდ ეს ოთხი შესწორებაა შეტანილი იმ დოკუმენტში, რომელიც დარიგდა მეორე მოსმენის დროს. დეზინფორმაცია სამწუხაროდ გავცელდა, თუმცა მოსახლეობას უნდა ჰქონდეს სწორი ინფორმაცია“, - განაცხადა კობახიძემ. მისივე თქმით, წარსულს ჩაბარდა დრო, როდესაც კანონპროექტებში გარკვეული ცვლილებები შეჰქონდათ.

დღეს პარლამენტის საშემოდგომო სესია ბიუროს სხდომით გაიხსნა. პარლამენტი სექტემბრის ბოლოს საკონსტიტუციო ცვლილებების მესამე მოსმენით მიღებას გეგმავს, რომელიც ორი მოსმენით საგაზაფხულო სესიაზე უკვე დაამტკიცეს.

საპარლამენტო უმრავლესობამ საკონსტიტუციო რეფორმასთან დაკავშირებით 1 სექტემბერს სპეციალური განცხადება გაავრცელა. განცხადების თანახმად, საპარლამენტო უმრავლესობაში მიაჩნიათ, რომ კონსტიტუციური კანონი არ შეიცავს არცერთ ნორმას, რომელიც აუმჯობესებს მმართველი პარტიის სუბიექტურ პოლიტიკურ პოზიციებს. "ამასთან, საკონსტიტუციო ცვლილებები გამორიცხავს საქართველოში ყოველგვარი ავტოკრატიის ჩამოყალიბებას გრძელვადიან პერსპექტივაში", - წერია განცხადებაში.

უმრავლესობის გადაწყვეტილებას უკვე გამოეხმაურა "ევროპული საქართველო" და "ნაციონალური მოძრაობა".

15 კვალიფიციური პარტიის გადაწყვეტილებით, მიუხედავად ჩიხში შესული მოლაპარაკებებისა, პარტიები 6 სექტემბერს ვენეციის კომისიას შეხვდებიან. ამის შესახებ დღეს მამუკა კაციტაძემ განაცხადა. 30 აგვისტოს ცნობილი გახდა, რომ ოპოზიცია ხელისუფლებასთან მოლაპარაკებებზე მხოლოდ პროპორციულ სისტემაზე გადასვლასთან დაკავშირებით წავიდოდა.

ვენეციის კომისიის პრეზიდენტმა მხარეებს 6 სექტემბერს სტრასბურგში შეხვედრა შესთავაზა, სადაც ერთმანეთს მმართველი კოალიციისა და ოპოზიციური პარტიების წარმომადგენლები შეხვდებოდნენ.