ეველინ ფარკასი: ჩვენ გვსურს, საქართველოს მთავრობა რუსეთის სანქცირებაში უფრო აქტიურად ჩართული ვიხილოთ - რუსეთს ახლა ახალი ფრონტის გახსნა არ შეუძლია

„რადიო თავისუფლებამ“ მაკკეინის ინსტიტუტის აღმასრულებელ დირექტორთან, ეველინ ფარკასთან ინტერვიუ გამოაქვეყნა, რომელშიც ის რუსეთ-უკრაინის ომსა და, ამ კონტექსტში, საქართველოს გეოპოლიტიკურ მდგომარეობაზე ამახვილებს ყურადღებას.

„თქვენ შეიძლება გქონდეთ სავაჭრო ურთიერთობა რუსეთთან, თუმცა აქ სანქციების საკითხი დგება და უნდა იფიქრო, როგორ წარმართო სავაჭრო ურთიერთობა. შეიძლება, გქონდეთ დიპლომატიური ურთიერთობა რუსეთთან და მაინცდამაინც ყველაფერში არ შეეწინააღმდეგო, მაგრამ რაღაც უნდა მისცე აშშ-სა და დასავლეთს, თუკი გინდა ამ თანამეგობრობის წევრი იყო“, - აცხადებს მაკკეინის ინსტიტუტის აღმასრულებელ დირექტორი.

კითხვაზე, თუ რა შეიძლება იყოს ეს „რაღაც“, ფარკასი ამბობს: „სანქციები. ჩვენ გვსურს, ვიხილოთ საქართველოს მთავრობა უფრო აქტიურად ჩართული რუსეთის სანქცირებაში, რადგან არ არსებობს სხვა გზა, რომელში ჩართვაც, საქართველოს მთავრობას და ჩვენ - აშშ-ს გვსურს. როცა ვლადიმერ პუტინმა ახალი შეჭრა წამოიწყო, ის უკვე იყო უკრაინაში, როგორც ის დღეს არის საქართველოში და შეუძლია, ხელახლა შემოიჭრას საქართველოში, თუკი მოინდომებს და ჩათვლის, რომ ვერ აკონტროლებს ხალხსა და მთავრობას, მაგრამ ახლა ეს მისთვის ძვირადღირებული ვარიანტია, რადგან ახლა უკრაინითაა დაკავებული, თუმცა, თუკი ის უკრაინაში გაიმარჯვებს, მეორე დღესვე, ის აქ მოვა და შეეცდება, საქართველო და მოლდოვა გააკონტროლოს. ვლადიმერ პუტინი ვერ იგებს უკრაინაში, ამიტომაც, როცა ის ესტონეთს ემუქრება, მე ვამბობ: „არ მიაქციოთ ყურადღება, ის ამას მხოლოდ დასავლეთის დასაშინებლად ამბობს, რათა ჩვენ უკრაინას გაზრდილი მხარდაჭერა არ მივაწოდოთ“. მას ახლა ახალი ფრონტის გახსნა არ შეუძლია, ის უკრაინაში ვერ გაიმარჯვებს. ვიცი, რომ [რუსეთი] საგუშაგოებს წევს სამხრეთ ოსეთთან საზღვარზე, კი, შეუძლია, ეს ყველაფერი აკეთოს, მაგრამ ის ვერ გააკონტროლებს საქართველოს. დასავლეთი და საერთაშორისო საზოგადოება საქართველოს მხარესაა და დავრჩებით საქართველოს მხარეს ზუსტად ისე, როგორც უკრაინის მხარეს ვართ. გვჯერა, რომ საქართველოსაც აქვს თავდაცვის უფლება“, - ამბობს ფარკასი.

ეველინ ფარკასთან ინტერვიუს დღეს საქართველოს პარლამენტის წევრები - სოზარ სუბარი, დიმიტრი ხუნდაძე, გურამ მაჭარაშვილი და მიხეილ ყაველაშვილი გამოეხმაურნენ. საზოგადოებრივი მოძრაობის „ხალხის ძალა“ წევრები აცხადებენ, რომ „ფარკასმა ღიად მოუწოდა საქართველოს ხელისუფლებას რუსეთისთვის სანქციების დაწესებისკენ“.