რატი იონათამიშვილი მოსამართლე გვენეტაძის შესახებ „TV პირველის“ მიერ მომზადებულ სიუჟეტზე: ძალიან ბევრი დეზინფორმაცია და ფაქტობრივი უზუსტობა მოვისმინეთ

საპარლამენტო უმრავლესობის წევრის, რატი იონათამიშვილის განცხადებით, „TV პირველი“, რომელმაც მოსამართლე ნინო გვენეტაძისა და თანამდებობის მაღალი პირების შესახებ სიუჟეტი მოამზადა, მიზანმიმართულად ავრცელებს დეზინფორმაციას.

„ამასთან დაკავშირებით, ძალიან ბევრი დეზინფორმაცია და ფაქტობრივი უზუსტობა მოვისმინეთ, მათ შორის, მაშინ, როდესაც არგუმენტების თქმას ცდილობდნენ, წლებიც კი აერიათ და ელემენტარულად, თანმიმდევრულები ამაშიც კი არ იყვნენ. ამით, კიდევ ერთხელ გამოააშკარავეს, როგორ მოგონილ „ფეიკთან“ და დადგმულ ამბავთან გვქონდა საქმე. ახლა, იმის ნაცვლად, რომ ეს შეცდომა აღიარონ და საკუთარ მაყურებელს ბოდიში მოუხადონ, თუ ისინი ისევ, ცალკეული არასამთავრობოების ხელით, საგამოძიებო კომისიის შექმნას ითხოვენ, კიდევ უფრო უხერხულ მდგომარეობაში ჩაიყენებენ საკუთარ თავებს“, - აცხადებს რატი იონათამიშვილი.

„ნოდარ მელაძის შაბათის“ ეთერში გასული სიუჟეტის ავტორი, გოგაშვილის ინფორმაციაზე დაყრდნობით, აცხადებს, რომ „მოსამართლე ნინო გვენეტაძის გადაყენებასთან დაკავშირებით, მეორე თათბირი, ისევ მოდულის შენობაში ჩატარდა. ივანიშვილი მოდულს, შეკვეთილიდან ჩაერთო, ხოლო შოთაძე - თურქეთიდან, ეს ხდებოდა 2021 წლის ივლისში“. დადასტურებული ფაქტებით ირკვევა, რომ უზენაესი სასამართლოს ყოფილმა თავმჯდომარემ ნინო გვენეტაძემ თანამდებობა 2018 წლის 2 აგვისტოს დატოვა პირადი განცხადების საფუძველზე და თანამდებობიდან გადადგომის მიზეზად, ჯანმრთელობის მდგომარეობა დაასახელა. სიუჟეტის ავტორის თქმით, სოსო გოგაშვილის მიერ მიწოდებული ინფორმაციაზე დაყრდნობით, თუ მოსამართლის გადადგომის შესახებ დაგეგმილი თათბირი 2021 წელს შედგა, იმ დროისთვის, გვენეტაძეს თანამდებობა სამი წლის წინ ჰქონდა დატოვებული.