„ნაცმოძრაობის“ ყოფილი წევრი: „ნაციონალური მოძრაობის“ ყოველდღიურობა იმ პროექტების დისკრედიტაციაა, რომლებსაც ხელისუფლება ახორციელებს, მაგრამ ყველაზე დიდი ამორალურობა საკუთარი წევრების პირადი მიმოწერით შანტაჟია

ბათუმში, სპეციალურ საგამოძიებო სამსახურში, „ნაციონალური მოძრაობის“ ყოფილი წევრი მალხაზ თავდგირიძე უკვე მეორედ გამოკითხეს.

დღეს, მოსამართლის განჩინების საფუძველზე, დამატებითი მტკიცებულებებიც ამოიღეს. თავდგირიძე თანაგუნდელებს შანტაჟსა და ზეწოლაში ადანაშაულებს.

„ჩემი ტელეფონიდან ამოიღეს ის ინფორმაცია, რომელიც ინახებოდა და რომელზეც გუშინ ვისაუბრე. ეს იყო პირადი მიმოწერა, რომელიც უკანონოდ იყო მოპოვებული და მესამე პირებზე გასაჯაროვდა. ვიღაცის მიმართ კრიტიკული მოსაზრება მქონდა თუ მიმოწერაში მოვიხსენიებდი, ეს იყო ის, რის გამოც [თანამდებობის] დატოვებას მთხოვდნენ. უნდა დამეტოვებინა ხელვაჩაურის საკრებულოს წევრობის მანდატი. „ნაციონალური მოძრაობის“ ყოველდღიურობა იმ პროექტების დისკრედიტაციაა, რომლებსაც ხელისუფლება ახორციელებს, მაგრამ ყველაზე დიდი ამორალურობაა, როცა ადამიანების პირადი მიმოწერით, საკუთარი პარტიის წევრების შანტაჟი ხდება“, - აცხადებს თავდგირიძე.

„ნაციონალურ მოძრაობაში“ მის ბრალდებას უარყოფენ. ხელვაჩაურის საკრებულოს „ნაციონალური მოძრაობის“ ფრაქციის თავმჯდომარემ პარტია უკვე დატოვა.

გამოძიება, სამსახურებრივი მდგომარეობის გამოყენებით, პირადი მიმოწერის უკანონოდ მოპოვებისა და გავრცელების ფაქტზე დაიწყო.