მიხეილ სარჯველაძე: მნიშვნელოვანია ჩვენი ამომრჩევლის შეფასება იმასთან დაკავშირებით, რამდენად ყველაფერი გავაკეთეთ 12-პუნქტიანი გეგმის შესრულებისთვის და იმისთვის, რომ საქართველოს ევროპეიზაცია არ შეფერხებულიყო

როგორც იტყვიან, ჰა ბურთი და ჰა მოედანიო, ასე გამოგვიცხადეს თავის დროზე [ევროპელებმა] და ჩვენ მივყევით და ეს საქმეები ვაკეთეთ, რეალურად დადებულია ეს პროექტები, - ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ გადაცემა „იმედი LIVE-ში" განაცხადა.

„არანაკლებ მნიშვნელოვანი, თუ მეტად არა, იქნება ჩვენი ამომრჩევლის შეფასება იმასთან დაკავშირებით, ვინ რა გააკეთა და რამდენად ყველაფერი გავაკეთეთ იმისთვის, რომ 12-პუნქტიანი გეგმა შესრულებულიყო და საქართველოს ევროპეიზაცია არ შეფერხებულიყო, თუმცა რასაკვირველია თანაბრად მნიშვნელოვანია, რომ ევროპამ ეს სწორად შეაფასოს და დაინახოს. მე არ მგონია, რომ ვინმემ უარყოს ფაქტების დონეზე, რაც უდავოდ ჭეშმარიტებაა ამ საკითხებთან დაკავშირებით. მათ შორის, თუნდაც იმ ორმაგი ორი მესამედის მათი მხრიდან გამწვავებული თემა, რაზედაც თვითონ გადასარევად იციან, რომ მსოფლიოში ერთი ქვეყანა არ არის, რომ მსგავსი მოდელი ჰქონდეს და ამას გვიმტკიცებენ, რომ ეს არის უდავო ჭეშმარიტება.
როგორც იტყვიან, ჰა ბურთი და ჰა მოედანიო, ასე გამოგვიცხადეს თავის დროზე [ევროპელებმა] და ჩვენ მივყევით და ეს საქმეები ვაკეთეთ, რეალურად დადებულია ეს პროექტები. მე-11 პუნქტი, იყო ერთ-ერთი, რომელიც გვეუბნება, რომ უფრო აქტიურად უნდა დანერგოთ ეროვნულ სასამართლოებში, რომ პრაქტიკაში ხშირად გამოიყენებოდეს სტრასბურგის იურისპრუდენცია. მოვიწვიეთ სამუშაო ჯგუფი, აკადემიური წრეები, ოპოზიცია, არასამთავრობო ორგანიზაციები ესწრებოდნენ. რაც კი იდეა ითქვა, ყველას თავი მოეყარა და შეიკრა პაკეტი, გამზადდა, ვადაზე ადრე დავაინიცირეთ და სამივე მოსმენით მივიღეთ. მაგალითად რეფორმების ჯგუფმა, რომელიც დღეს დიდაქტიკური ტონით გვესაუბრება ევროპული რეკომენდაციების შესრულების აქტუალობაზე, არცერთ მოსმენაზე [მხარი არ დაუჭირა]. ერთი გამონაკლისი იყო - არ ვიცოდი რა პროექტიაო ტარიელ ნაკაიძემ თქვა და პირველი მოსმენის დროს მხარი დაუჭირა“, - აღნიშნა სარჯველაძემ.