გია ცაგარეიშვილი ანტიკორუფციული ბიუროს შექმნაზე: დარწმუნებული ვარ, აქაც შეიძლება ოქროს შუალედის პოვნა, ისევე როგორც გენერალური პროკურორის არჩევის საკითხზე შევჯერდით

დარწმუნებული ვარ აქაც შეიძლება რაღაც ოქროს შუალედის პოვნა, ისევე როგორც გენერალური პროკურორის არჩევის საკითხზე შევჯერდით და შესაბამისი ხმებიც მოიპოვა ამ საკონსტიტუციო ცვლილებამ, - ამის შესახებ საპარლამენტო უმრავლესობის წევრმა, გია ცაგარეიშვილმა „ქრონიკაში“ ანტიკორუფციული ბიუროს შექმნაზე საუბრისას განაცხადა.

მისი თქმით, უკვე დაიწყო დავა იმ საკითხზე, რომლის არც განხილვა მომხდარა ჯერ და პროექტიც კი არავის უნახავს. მისივე განმარტებით, ძალიან არაჯანსაღი ინტერპრეტირება ხდება ანტიკორუფციული ბიუროს შექმნის პროცესის.

„რა თქმა უნდა, ჩვენ ამ მიმართულებით ვიაქტიურებთ. ან დავეყდნობით იმ არსებულ მოდელებს და არის რამდენიმე სტრუქტურა ამ ქვეყანაში, რომლებიც კორუფციის აღმოფხვრის პრევენციისა და კორუფციის წინააღმდეგ მიმართულებით მუშაობს. ან ამ სტრუქტურებზე იქნება შესაბამისი დაყრდნობა, ან შესაძლებელია შეიქმნას ქვეყანაში შესაბამისი ახალი დანაყოფი. ჩვენ ახლა ვსაუბრობთ ამაზე და ამ თემის განხილვის საწყის ეტაპზე ვართ. შორს მიმავალი დასკვნები, რომ კენჭისყრის კვორუმი მაღალი იყოს, არ ავარჩევინოთ პრემიერს, დავანიშნინოთ პარლამენტს და ა.შ. ნებისმიერი ამგვარი ვერსია განხილვადია და ჩვენ არ გვაქვს აქ კარები ჩაკეტილი და ჩვენ არ ვართ გაუცხოებული ამ პროცესისგან, მაგრამ ნება გვიბოძეთ, ჩვენ ჩვენი ვარიანტი შევთავაზოთ საზოგადოებას. მათ შორის პოლიტიკურ ძალებს პარლამენტში. შემდეგ დავიწყებთ ბჭობას და დარწმუნებული ვარ აქაც შეიძლება რაღაც ოქროს შუალედის პოვნა, ისევე როგორც გენერალური პროკურორის არჩევის საკითხზე ჩვენ შევჯერდით და შესაბამისი ხმებიც მოიპოვა ამ საკონსტიტუციო ცვლილებამ“, - განაცხადა გია ცაგარეიშვილმა.