მიხეილ სარჯველაძე: 12 პუნქტის შესრულების საკითხზე ეუთო/ოდირის ჩართულობა მნიშვნელოვანი იქნება

არაერთი რეფორმის ფარგლებში გვქონდა ჩვენ თანამშრომლობის შესაძლებლობა და ბევრი წარმატება სწორედ ამ თანამშრომლობის შედეგად არის მოტანილი ქვეყანაში, - ამის შესახებ საპარლამენტო უმრავლესობის წევრმა მიხეილ სარჯველაძემ ეუთო/ოდირის დელეგაციის ვიზიტის შეფასებისას განაცხადა.

მისივე თქმით, 12 პუნქტის შესრულების საკითხზე ეუთო/ოდირის ჩართულობაც მნიშვნელოვანი იქნება, განსაკუთრებით კი საარჩევნო კანონმდებლობის რეფორმის კუთხით.

„საზოგადოდ მნიშვნელოვანია თანამშრომლობა ისეთ ორგანიზაციასთან, როგორიც ეუთო/ ოდირია. ეს მართლაც დიდი ხნის და ძალიან მჭიდრო პარტნიორია საქართველოსთვის. არაერთი რეფორმის ფარგლებში გვქონდა ჩვენ თანამშრომლობის შესაძლებლობა და ბევრი წარმატება სწორედ ამ თანამშრომლობის შედეგად არის მოტანილი ქვეყანაში. ამიტომ განსაკუთრებულად ვაფასებთ ამ ურთიერთობას, თანამშრომლობას და ჩვენთვის ეს განსაკუთრებულად ღირებულია. ბუნებრივია, რომ ჩვენ გვესმის მათ შორის ასეთი ტიპის ფორმატებში თანამშრომლობისა და მუშაობის მნიშვნელობა, როდესაც უშუალოდ კომუნიკაციის გზით გვაქვს იმ საჭიროებებზე, სამომავლო რეფორმებზე საუბრის შესაძლებლობა, რომელიც დაგეგმილია საქართველოში და შეგვაძლებინებს წარმატების მიღწევას იმ რეფორმების მიმართულებით, რომელიც მათ შორის 12 პუნქტს უკავშირდება. განსაკუთრებით კი ეს საარჩევნო კანონმდებლობის რეფორმას ეხება“, - აღნიშნა სარჯველაძემ.

მისივე თქმით, უმრავლესობის და ოპოზიციის შეჯერება რომელიმე საკითხზე არ არის დამოკიდებული იმაზე, თუ რა შინაარსი აქვს რეფორმას ან როგორია კონკრეტულად დისკუსიის საგანი ან მასთან დაკავშირებით მიღწეული შეთანხმება თუ შეუთანხმებელი საკითხები.

„სამწუხაროდ, ოპოზიციის გარკვეული ნაწილი დღემდე ინარჩუნებს აბსოლუტურად დესტრუქციულ დამოკიდებულებას, რაშიც იგულისხმება არა ის, რომ ამ შემთხვევაში ისინი კატეგორიულები არიან რაღაც საკითხთან დაკავშირებით, არამედ არის ოპოზიციის ერთი ნაწილი, რომელსაც მიზნად აქვს დასახული, რომ ხელი შეუშალოს 12 პუნქტის განხორციელებას. სადაც კი შესაძლებლობას ნახულობენ ამ შანსს ხელიდან არ უშვებენ. ეს არის ფაქტი. სამი მოსმენა ისე გაიარა მე-11 პუნქტის შესრულებამ, რომელიც გულისხმობდა სტრასბურგის ადამიანის უფლებათა ევროპული სასამართლოს იურისპრუდენციის იმპლემენტაციის ხელშეწყობას საქართველოს სასამართლოს პრაქტიკაში, რომ არცერთი მოსაზრება, რომელიც კი ითქვა, არ ყოფილა ისეთი, რომ არ ინტეგრირდა ამ საკანონმდებლო პაკეტში. არავითარი შეუთანხმებელი საკითხი არ არსებობდა და მიუხედავად ამისა ერთ-ერთმა პოლიტიკურმა ჯგუფმა საერთოდ არც ერთხელ ხმა არ მისცა ხმა, ერთი გამონაკლისის გარდა, როცა ერთ-ერთმა დეპუტატმა პირველი მოსმენის დროს ხმა დააფიქსირა და ისიც განმარტა, რომ წარმოდგენა არ მქონდა რა იხილებოდაო. ასეთ ფონზე ძალიან ძნელია იმაზე საუბარი, რომ ეს ხალხი განწყობილია მოლაპარაკებისთვის, რაღაც შედეგის მიღებისთვის“, - განაცხადა მიხეილ სარჯველაძემ.