შალვა პაპუაშვილი „ნაცმოძრაობაზე“: ოპოზიციის წარმომადგენლები პირდაპირ ხელს ადებენ დავით კეზერაშვილს, რომ ის ამ შიდა პარტიული გადატრიალების უკან დგას. სწორედ ეს არის ოლიგარქიის ცუდი გავლენა, რომელზეც ევროკომისია საუბრობდა

„ნაციონალური მოძრაობა" არის პარტია, რომელიც არ ეფუძნება ძირითად ღირებულებებს, რომელიც პოლიტიკაში მყოფ ადამიანებს უნდა ჰქონდეთ. ეს არის სხვისი პატივისცემა, სხვისი აზრისა და უფლებების პატივისცემა. მათ ეს საბაზისო პრინციპები არ აქვთ და მათ ეს საბაზისო პრინციპები რომ არ ჰქონდათ, ამიტომაც, ისინი ხელისუფლებას ჩამოაცილა ქართველმა ხალხმა, - ამის შესახებ პარლამენტის თავმჯდომარემ, შალვა პაპუაშვილმა განაცხადა. მისი თქმით, მათ გუნდში ოლიგარქიული გავლენა დიდია.

„ახლა ამ საბაზისო პრინციპების არარსებობის გამო საკუთარ გუნდშივე აქვთ დაპირისპირება, რადგან პატივს არ სცემენ საკუთარი გუნდის წევრების მოსაზრებებს, რაც იწვევს დაპირისპირებას. ეს ყველაფერი გვაჩვენებს, თუ რამხელაა ოლიგარქიული გავლენა რადიკალურ ოპოზიციაში. ჩვენ ამას პირდაპირ გვიდასტურებენ ოპოზიციის წარმომადგენლები, რომლებიც პირდაპირ ხელს ადებენ დავით კეზერაშვილს, რომ ის არის ადამიანი, რომელიც ამ შიდა პარტიული გადატრიალების უკან დგას. ეს არის ოლიგარქიის ცუდი გავლენა, რომელზეც სწორედ ევროკომისია საუბრობდა. საბოლოო ჯამში, ერთადერთი რაც შეიძლება ვისურვოთ, "ნაციონალური მოძრაობა" მინიმუმ საკუთარ პარტიაში მაინც შეძლებს ოლიგარქიული გავლენების რამენაირად შესუსტება, თუმცა როგორც ვხედავთ, პირიქით, მიდის და როგორც ჩანს, ეს საქმე უფრო გაძლიერებისკენ წავა. ეს არის ბრძოლა ხელისუფლებისთვის და იმისთვის, რომ დაიბრუნონ აბსოლუტური ძალაუფლება, რომელიც ჰქონდათ, როცა ისინი არ იყვნენ ანგარიშვალდებული ქართველი ხალხის წინაშე და საკუთარი ყოველდღიური განწყობის მიხედვით წყვეტდნენ ქვეყნის საგარეო თუ საშინაო პოლიტიკის საკითხებს. ეს არის, რაც პოლიტიკოსების ამ ჯგუფს აქვს მონატრებული და სურთ, რომ ეს აბსოლუტური ძალაუფლება დაიბრუნონ, რაც თავის მხრივ, შემდეგ, მათ დააბრუნებთ იმ კორუფციულ სქემებთან, რომელიც მათ ჰქონდათ და ვნახეთ, ამ კორუფციული სქემებით როგორ გამდიდრდნენ და გახდნენ ოლიგარქები დღეს ოპოზიციაში მყოფი ზოგიერთი პირი, რაც ჩვენი სასამართლოს მესამე ინსტანციამაც დაადასტურა, როცა დაადასტურა 5 მილიონი ევროს მოპარვის საკითხი ქართველი ჯარისგან და როგორ გამდიდრდა ერთი ადამიანი ქართულ ჯარზე 2008 წლის ომამდე რამდენიმე თვით ადრე, რომ ფურცელზე ჩაატარა წვრთნა, რომელიც რეალურად არსად ჩატარებულა და არც ერთ ქართველ ჯარისკაცს ეს წვრთნა არ გაუვლია და ჩვენი ბიუჯეტიდან ისე დაიხარჯა 5 მილიონი რომელიღაც კომპანიის სასარგებლოდ“, - განაცხადა პაპაუაშვილმა.

„ნაციონალური მოძრაობის“ წევრების ნაწილი პარტიის თავმჯდომარის და პოლიტსაბჭოს არჩევნების ჩატარებას ითხოვს.