ხათუნა სამნიძე: ამ ქვეყანაში და პარლამენტში ყველას ერთად გვინდა, რომ მივიღოთ კანდიდატის სტატუსი

პოლიტიკური ჯგუფის „რეფორმების ჯგუფის“ ხელმძღვანელი, ხათუნა სამნიძე მიიჩნევს, რომ ევროკავშირის წევრობის სტატუსის მიღებაზე მთავარი პასუხისმგებელი საქართველოს ხელისუფლებაა. ამის შესახებ განცხადება, პარლამენტის წევრმა დღევანდელ პლენარულ სხდომაზე გააკეთა, სადაც ინტერპელაციის წესით, ქვეყნის პრემიერ-მინისტრს მოუსმინეს.

„ის ამოცანა, რომ ჩვენმა ქვეყანამ მიიღოს ევროპული კანდიდატის სტატუსი სასიცოცხლოდ მნიშვნელოვანია და ნომერ პირველი ამოცანაა, როგორც ხელისუფლებისთვის, ასევე ოპოზიციისთვის. მე არ ვფიქრობ, რომ ამაზე მნიშვნელოვანი ამოცანა დღეს დგას დღის წესრიგში. ინტერპელაციის ჩვენი შეკითხვები პრემიერის მხრიდან კონკრეტული ფაქტების დასახელებას ითვალისწინებდა. მე ვფიქრობ, რომ თქვენ მადლობა უნდა გეთქვათ შეკითხვების თითოეული ხელმომწერისთვის იმიტომ, რომ ეს იყო თქვენი შესაძლებლობა, რომ საპარლამენტო ტრიბუნიდან გეთქვათ, თუ რას აკეთებს მთავრობა და რა არის მთავრობის პასუხისმგებლობა, როდესაც სტატუსის მიღებაზე ვსაუბრობთ. დღეს საკომიტეტო და სასესიო მოსმენებზე ყველა, როგორც ოპოზიციის, ასევე ხელისუფლების სრული შემადგენლობა ჩართულია ამ პროცესში და არავინ არ არიდებს თავს არც კრიტიკას, არც ჩართულობას და არც კონსენსუსის საფუძველზე ხმის მიცემას, როდესაც ჩვენ ვთანხმდებით და ინიციატივა და კანონპროექტი არის სწორი.

როდესაც თქვენი მინისტრები აქ დგანან და ჩვენ ვეკითხებით, თუ რა გაკეთდა ხელისუფლების პირობებში, საუბარი მიდის ისევ მომავალ დროში. თქვენ შემთხვევაში, როდესაც უნდა გესაუბრათ ევროპულ მომავალზე, თქვენ არჩიეთ, რომ წარსულზე გელაპარაკათ და ისევ ოპოზიციისკენ და წინა ხელისუფლებისკენ გაიშვირეთ ხელი. ძალიან კარგად იცის თქვენმა გუნდმა, რომ ევროპული მომავალი არის ჩვენი მთავარი არჩევანი და მთელი ქვეყანა დგას ამ მხარეს. არავინ აქ, ამ ქვეყანაში და პარლამენტში მითუმეტეს, არ არის სხვა მხარეს, ყველას ერთად გვინდა, რომ მივიღოთ სტატუსი და ამ პროცესში პასუხისმგებლობის ძირითადი ტვირთი ხელისუფლებაზეა“, - განაცხადა ხათუნა სამნიძემ.