მაკა ბოჭორიშვილი: ევროკავშირთან პოლიტიკურ დიალოგს ჩვენ უმაღლეს დონეზე გავაგრძელებთ

შევხვდით ევროპარლამენტის სხვადასხვა პოლიტიკურ ჯგუფს. ყველა პოლიტიკურ ჯგუფში არიან ადამიანები, რომლებიც ძალიან გულწრფელად უჭერენ მხარს საქართველოს ევროკავშირში ინტეგრაციას, თუმცა ასევე არიან ადამიანები, რომლებიც ცდილობენ ეს ანგარიში გამოიყენონ ვიწროპარტიული ინტერესების წინ დასაყენებლად, - ამის შესახებ ევროპასთან ინტეგრაციის კომიტეტის თავმჯდომარემ მაკა ბოჭორიშვილმა განაცხადა.

„სამწუხაროდ, ხშირ შემთხვევაში კრიტიკა საფუძველს მოკლებულია და ისეა ასახული დოკუმენტში, რაც გამოიყენება პარტიული მიზნებისთვის. არის მცდელობები, რომ ევროპარლამენტის ანგარიშში აისახოს საქართველოს მიერ მიღწეული პროგრესი, თუმცა მცდელობები გარკვეული პარლამენტარების მხრიდან აკნინებს დოკუმენტის მნიშვნელობას.

მთავარი საქართველოს მიზანია. ეს მიზანი ევროკავშირში ქვეყნის გაწევრიანებაა. ეს გზა არაა მარტივი, ეს გზა საკმაოდ რთულია. ძალიან ბევრი ნაბიჯი გვექნება გადასადგმელი სხვადასხვა ეტაპების გასავლელად. უმნიშვნელოვანესია კომუნიკაცია ევროკომისიასთან ყველა რეკომენდაციაზე და ამ პირობების შესრულებაზე. ევროპარლამენტი არის პოლიტიკური ორგანო. პარლამენტი სხვადასხვა პოლიტიკური ჯგუფებისგან შედგება. მათი მოსაზრებები ერთმანეთისგან განსხვავდება. ჩვენ მოვისმინეთ ძალიან ბევრი მოსაზრება იმ რეკომენდაციებზე, რაც საქართველოზე წარადგინა ევროკომისიამ. ძალიან რთულია ჭეშმარიტი გზის მოძებნა, თუ რას ფიქრობენ ერთსულოვნად. ძალიან მნიშვნელოვანია ევროკომისიის მიდგომები, მათი მოსაზრებები და შეფასებები. ეს გზა აქვს საქართველოს გასავლელი ევროკავშირში გასაწევრიანებლად და აუცილებელია ამ ნაბიჯების გადადგმა. ჩვენ უმაღლეს დონეზე გავაგრძელებთ ევროკავშირთან პოლიტიკურ დიალოგს. ჩვენ ვნახეთ ყველამ ევროკომისრის ვიზიტი და საქართველოს მთავრობის წარმომადგენლების ვიზიტი ბრიუსელში. ეს ვიზიტები მიმართულო იყო იმისკენ, რომ რეალური ინტეგრაციისთვის გადადგას ქვეყანამ ნაბიჯები. კომპლექსური საკითხია და მოიცავს ენერგეტიკული კავშირების გამყარებას, ეკონომიკური კავშირების გაღრმავება, რაც შექმნის გარემოს ევროკავშირში ინტეგრაციისთვის“, - განაცხადა ბოჭორიშვილმა.

ევროკომისია გაფართოების შესახებ ვრცელ ანგარიშს, 2023 წლის ოქტომბერში მოამზადებს. მანამდე ევროპარლამენტარებსა და ქართველ კანონმდებლებს შორის აქტიური მუშაობა მიმდინარეობს. სტრასბურგში მაკა ბოჭორიშვილი და ირაკლი ჩიქოვანი ევროდეპუტატებთან შეხვედრებს მართავენ. დეპუტატებს აქვთ მოლოდინი, რომ ევროინტეგრაციის გზაზე საქართველოს მიერ მიღწეული პროგრესი სათანადოდ შეფასდება და პოზიტიურად აისახება იმ პოლიტიკურ გადაწყვეტილებაზე, რომელიც ბრიუსელმა უნდა მიიღოს.