ნინო ლომჯარია არასამთავრობო სექტორთან პარტიების ფინანსურ გამჭვირვალობას განიხილავს

13 აგვისტოს, სახელმწიფო აუდიტის სამსახურის გენერალური აუდიტორის მოვალეობის შემსრულებელი ნინო ლომჯარია პოლიტიკური ფინანსების გამჭვირვალობისა და კანონიერების მონიტორინგის საკითხებზე მომუშავე დროებითი საკონსულტაციო კომისიის ფარგლებში, არასამთავრობო სექტორის წარმომადგენლებთან შეხვედრას გამართავს.

ლომჯარიას თქმით, შეხვედრის მიზანია არასამთავრობო ორგანიზაციებს გააცნონ ის ნაბიჯები, რომლებიც პარტიების დაფინანსების გამჭვირვალობის კუთხით უწყებამ გადადგა და მათ მიაწოდონ ინფორმაცია იმის შესახებ, შეისწავლიან თუ არა ცალკეულ შემოწირულობებს.

გენერალური აუდიტორის მოვალეობის შემსრულებელი აცხადებს, რომ არსებობს მთლი რიგი საკითხები, რასთან დაკავშირებითაც მათ არასამთვრობო სექტორის პოზიციის მოსმენა სჭირდებათ, რადგან მისივე თქმით, არსებობს ისეთი სახის ახალი ტენდეციები, რომლებთან დაკავშირებითაც უწყებას წარსულში პრაქტიკა არ ჰქონია.

რაც შეეხება პარტიების საჩივრებს. ნინო ლომჯარია ამბობს, რომ შემოსულია ორი საჩივარი. პირველი: ნაციონალური მოძრაობის საჩივარი სამარშრუტო ტაქსებზე გაკრულ ბანერებთან დაკავშირებით და მეორე - მერობის დამოუკიდებელი კანდიდატის, ალეკო ელისაშვილის საჩივარი, დაფინანსებული ანტი-პიარ კამპანიის შესახებ.

14 არასამთავრობო ორგანიზაციისა და გენერალური აუდიტორის მოვალეობის შემსრულებლის შეხვედრა ხვალ, 12 საათზეა ჩანიშნული.