გივი მიქანაძე: საარჩევნო კანონმდებლობის რევიზიასთან დაკავშირებული ცვლილებების პროექტი ეუთო/ოდირმა და ვენეციის კომისიამ პოზიტიურად შეაფასეს

საარჩევნო კანონმდებლობის რევიზიასთან დაკავშირებული ცვლილებების პროექტი ეუთო/ოდირმა და ვენეციის კომისიამ პოზიტიურად შეაფასეს, - ამის შესახებ პარლამენტში გამართულ ბრიფინგზე უმრავლესობის წევრმა, გივი მიქანაძემ განაცხადა.

მისივე თქმით, ეუთო/ოდირმა და ვენეციის კომისიამ წინსწრებით წარმოადგინეს დასკვნის პროექტი, რომლის საბოლოო ვერსიის დამტკიცება ნავარაუდები აქვთ მიმდინარე წლის 15 დეკემბრის სხდომაზე.

„მსურს გავაკეთო განცხადება 12-პუნქტიანი გეგმის იმ ნაწილის განხორციელებაზე, რომელიც საარჩევნო კანონმდებლობის რევიზიას უკავშირდება. მოგეხსენებათ, რომ მმართველი გუნდის ინიციატივითა და ძალისხმევით, მიმდინარე წლის ივლისიდან პარლამენტში ევროკომისიის 12-პუნქტიანი გეგმით გათვალისწინებული აქტივობების განსახორციელებლად შეიქმნა და საქმიანობას ეწევა 9 სამუშაო ჯგუფი. ივლის-აგვისტოში სამუშაო ჯგუფებმა, რომლებშიც ოპოზიციის ნაწილი იყო ჩართული, 60-მდე სამუშაო შეხვედრა ჩაატარეს და შემუშავებული კანონპროექტები შესაბამისი კომიტეტების სახელით დააინიცირეს პარლამენტში. დღეს ჩვენ ვხედავთ, რომ რამდენიმე მიმართულებით 12-პუნქტიანი გეგმის ნაწილი სრულყოფილად შესრულდა, ხოლო დანარჩენზე მიმდინარეობს ინტენსიური მუშაობა. ჩვენი მიზანია, ამ გეგმით გათვალისწინებული უმეტესი აქტივობების შესრულება 2022 წლის ბოლომდე განხორციელდეს. მსურს საზოგადოების ყურადღება გავამახვილო საარჩევნო კანონმდებლობის რევიზიის კუთხით არსებულ მდგომარეობაზე. მოგეხსენებათ, რომ 5 ოქტომბერს პარლამენტმა პირველი მოსმენით მხარი დაუჭირა სამუშაო ჯგუფის მიერ მომზადებულ და იურიდიულ საკითხთა კომიტეტის მიერ ინიცირებულ პროექტს, რომელიც მოიცავდა შესაბამის ცვლილებებს საარჩევნო კოდექსსა და მოქალაქეთა პოლიტიკური გაერთიანებების შესახებ ორგანულ კანონში, რაც 10 ოქტომბერს ექსპერტული დასკვნისათვის გაიგზავნა ეუთო/ოდირსა და ვენეციის კომისიაში. ეუთო/ოდირმა და ვენეციის კომისიამ წინსწრებით წარმოადგინეს დასკვნის პროექტი, რომლის საბოლოო ვერსიის დამტკიცება ნავარაუდები აქვთ მიმდინარე წლის 15 დეკემბრის სხდომაზე. მოცემულ დასკვნაში ერთმნიშვნელოვნად იკვეთება ის პოზიტიური შეფასებები, რომლებიც კონკრეტულ ცვლილებებს უკავშირდება“, - განაცხადა მიქანაძემ.

მისივე თქმით, დასკვნის პროექტში რეკომენდაციებია რიგ საკითხებზე, შემდგომი სრულყოფის მიზნით, რაზეც ჯერ კიდევ პირველი მოსმენის ფორმატში მმართველმა გუნდმა განაცხადა, რომ მეორე მოსმენაზე ამ საკითხების უფრო დეტალურად გასწერს.

„ჩვენ დეტალურად გავიხილავთ დოკუმენტში ასახულ თითოეულ რეკომენდაციას და მეორე მოსმენისთვის წარვადგენთ შესაბამის ცვლილებებს. საზოგადოებას ახსოვს, რომ როდესაც ქართული ოცნების თავმჯდომარის მიერ საჯაროდ გამოცხადდა დეტალური სამოქმედო გეგმა, იქ გაიწერა, რომ საარჩევნო კანონმდებლობაში ცვლილებები მიღებული იქნება 2022 წლის ბოლომდე. მიუხედავად იმისა, რომ ჩვენ ეუთო/ოდირისა და ვენეციის კომისიისგან ველოდებოდით დასკვნას გაცილებით ადრე, არსებული მოცემულობა გვაძლევს საშუალებას რომ ეს ცვლილებები სამივე მოსმენით დეკემბრის ბოლომდე მივიღოთ.

მოგეხსენებათ, რომ არსებული პრაქტიკით, დასკვნის სამუშაო ვერსია ცვლილებებს ფაქტობრივად არ განიცდის. შესაბამისად, ვიხელმძღვანელებთ რა წარმოდგენილი დოკუმენტით, მიმდინარე კვირას იურიდიულ საკითხთა კომიტეტზე განსახილველად იქნება წარდგენილი ცვლილებათა პაკეტი მეორე მოსმენის ფორმატში და მხარდაჭერის შემთხვევაში, მომავალ სასესიო კვირას განხილული და დამტკიცებული იქნება პარლამენტის მიერ.

მინდა ვისარგებლო შემთხვევით და მადლობა გადავუხადო ეუთო/ოდირისა და ვენეციის კომისიის წარმომადგენლებს მნიშვნელოვანი დოკუმენტის წარმოდგენისა და თანამშრომლობისთვის. ქართული ოცნება ერთგულია ნაკისრი ვალდებულებების, მაღალი ხარისხით უზრუნველყოს 12 პუნქტიანი გეგმის სრულფასოვანი განხორციელება, რაც კონკრეტული ნაბიჯებითა და აქტივობებით დასტურდება“, - აღნიშნა მიქანაძემ.