ჩაბუქის სარჩელზე დევნილთა სამინისტროს პოზიცია ცნობილია

დევნილთა სამინისტრომ მუსტაფა ემრე ჩაბუქის სარჩელის შესაგებელი გამოაქვეყნა. ამის შესახებ გამოცემა "ლიბერალი" წერს.

7 ივლისს, ლტოლვილთა და განსახლების სამინისტრომ ჩაბუქს ლტოლვილის სტატუსის მინიჭებაზე უარი უთხრა. 2 აგვისტოს დაკავებულის ადვოკატებმა ლტოლვილთა და განსახლების სამინისტროს მიერ გამოცემული აქტი გაასაჩივრეს, რომლის საფუძველზეც ჩაბუქს და მის ოჯახის წევრებს, მათ შორის ორ მცირეწლოვან შვილს, ლტოლვილის სტატუსის მინიჭებაზე უარი ეთქვათ. შესაბამისი საჩივრით ადვოკატებმა თბილისის საქალაქო სასამართლოს ადმინისტრაციულ საქმეთა კოლეგიას მიმართეს.

სარჩელის შესაგებელის თანახმად, დევნილთა სამინისტრო პირველ სასარჩელო მოთხოვნას არ ეთანხმება და აცხადებს, რომ სამინისტროს მიერ გამოცემული აქტი სრულიად შეესაბამება კანონით დადგენილ მოთხოვნებს და არ არსებობს მისი გაბათილების საფუძველი.

დევნილთა სამინისტროს მიერ ჩაბუქის სარჩელის შესაგებელში წერია, რომ თავშესაფრის მაძიებლის განაცხადის განხილვისას სანდოობის შესაფასებლად გამოვლინდა შემდეგი არსებითი ფაქტები:

"1. თავშესაფრის მაძიებლების იდენტობა; 2. ფეტულაჰ გიულენის მომხრეობა/მხარდამჭერობა; 3. თავშესაფრის მაძიებლის მიმართ თურქეთში აღძრული სისხლის სამართლის საქმე; 4. განმცხადებლის მეუღლის მისამართით განხორციელებული მუქარა.

გასაუბრებისას თავშესაფრის მაძიებელმა არაერთგვაროვანი ინფორმაცია მოგვაწოდა ფეტულაჰ გიულენის მომხრეობა/მხარდაჭერასთან დაკავშირებით. მიღებულ ინფორმაციაზე დაყრდნობით კი თავშესაფრის სამმართველომ სანდოდ მიიჩნია, რომ მუსტაფა ემრე ჩაბუქი არის ფ. გიულენის მომხრე/მხარდამჭერი და მოძრაობის „ჰიზმეთ“ წევრი",- წერია დევნილთა სამინისტროს დოკუმენტში.

დოკუმენტში ასევე წერია, რომ მუსტაფა ემრე ჩაბუქის გიულენთან მოძრაობის წევრობას ადასტურებს თურქეთიდან მიღებული საექსტრადიციო მასალები, რომელსაც სამინისტრო "სანდოს" უწოდებს.

"სანდოდაა მიჩნეული, რომ თავშესაფრის მაძიებლის მიმართ თურქეთის რესპუბლიკაში აღძრულია სისხლის სამართლის საქმე, რაც დასტურდება მისი განცხადებით და საქართველოს მთავარი პროკურატურის მიერ გამოგზავნილი საექსტრადიციო მასალებით, რომლის თანახმადაც, მუსტაფა ემრე ჩაბუქის წინააღმდეგ საქმე აღძრულია თურქეთის რესპუბლიკის სისხლის სამართლის კოდექსის 314/2-ე მუხლით, რაც გულისხმობს  შეიარაღებული ტერორისტული ორგანიზაციის წევრობას.

გარდა ამისა, სანდოდაა მიჩნეული თავშესაფრის მაძიებლის - თუღბა ჩაბუქის მისამართით განხორციელებული მუქარა სოციალურ ქსელში „twitter“ გვერდზე, სადაც ნამდვილად არის კომენტარის სახით დატოვებული მუქარები.

ზემოაღნიშნულზე დაყრდნობით, შემდგომი ანალიზისთვის სანდოდ მივიჩნევთ, რომ თავშესაფრის მაძიებელი მუსტაფა ემრე არის თურქეთის რესპუბლიკის მოქალაქე ფ. გიულენის მოძრაობის „ჰიზმეთ“ წევრი, რომლის მიმართ თურქეთის რესპუბლიკაში აღძრულია სისხლის სამართლის საქმე და რომლის მეუღლის მიმართაც განხორციელდა მუქარები",- წერია დევნილთა სამინისტროს შესაგებელ დოკუმენტში.

ამასთან, დოკუმენტის თანახმად, დევნილთა სამინისტრო მიიჩნევს, რომ „წარმოშობის ქვეყნის შესახებ ინფორმაციის, ინდივიდუალური პროფილის, განმცხადებლის გამოცდილებისა და მსგავს მდგომარეობაში მყოფი ადამიანების სიტუაციის გათვალისწინებით არ იკვეთება იმის შესაძლებლობა, რომ წარმოშობის ქვეყანაში დაბრუნების შემთხვევაში განმცხადებელი დადგეს დევნის საფუძვლიანი შიშის რისკის ქვეშ".

დემირელის სკოლის მენეჯერი მუსტაფა ემრე ჩაბუქი საქართველოში 24 მაისს დააკავეს. დემირელის კოლეჯის ხარისხის მართვის მენეჯერს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მას ბრალად შეიარაღებული ტერორისტული ორგანიზაციის წევრობა ედება.