პარლამენტმა შერიგებისა და სამოქალაქო თანასწორობის საკითხებში სახელმწიფო მინისტრის აპარატის 2022 წლის საქმიანობის ანგარიში მოისმინა

პარლამენტმა დღევანდელ სხდომაზე მინისტრის საათის ფორმატში შერიგებისა და სამოქალაქო თანასწორობის საკითხებში სახელმწიფო მინისტრის აპარატის 2022 წლის საქმიანობის ანგარიში მოისმინა, რომელიც დეპუტატებს მინისტრმა თეა ახვლედიანმა წარუდგინა, - ამის შესახებ ინფორმაციას პარლამენტის პრესსამსახური ავრცელებს.

მათივე ინფორმაციით, ანგარიში მოიცავდა ინფორმაციას როგორც შერიგების და ჩართულობის სახელმწიფო პოლიტიკის, ასევე სამოქალაქო თანასწორობის და ინტეგრაციის პოლიტიკის მიმართულებით.

მინისტრის განცხადებით, 2022 წელი განსაკუთრებით იყო დატვირთული ახალი გამოწვევებით, რაც დიდწილად უკავშირდება რუსეთის მიერ უკრაინის წინააღმდეგ განხორციელებულ ფართომასშტაბიან სამხედრო აგრესიას და რეგიონში უსაფრთხოების კუთხით მნიშვნელოვნად შეცვლილ გარემოს.

„სამწუხაროდ, საერთაშორისო საზღვრების ძალისმიერი მეთოდებით შეცვლის და სახელმწიფოთა სუვერენიტეტის ხელყოფის რუსეთის უკანონო პოლიტიკა საქართველოსთვის კარგად ნაცნობია. ჩვენს ქვეყანას განსაკუთრებულად კონფლიქტის შედეგად უშუალოდ დაზარალებულ მოსახლეობას ყოველდღიურად უწევს აფხაზეთსა და ცხინვალის რეგიონების მიმდინარე ოკუპაციის უმძიმეს შედეგებთან გამკლავება. როგორც უსაფრთხოების და ჰუმანიტარული გამოწვევების, ასევე ადამიანის უფლებების რეალიზების კუთხით“, - აღნიშნა თეა ახვლედიანმა.

ოკუპირებულ ტერიტორიებზე არსებული ვითარების გაცნობის შემდეგ, თეა ახვლედიანმა აღნიშნა, რომ ყველა ზემოაღნიშნულ საკითხზე შესაბამის საერთაშორისო ფორმატში გრძელდებოდა საქართველოს ყველა შესაბამისი უწყების კონსოლიდირებული და ინტენსიური ძალისხმევა არსებული მექანიზმების გამოყენებით და სტრატეგიულ პარტნიორებთან მჭიდრო თანამშრომლობით.

„ჟენევის საერთაშორისო მოლაპარაკებების ფარგლებში სახელმწიფო მინისტრის აპარატი მეორე - ჰუმანიტარულ სამუშაო ჯგუფს ხელმძღვანელობდა.
შეხვედრების, მათ შორის, 2022 წელს გამართული რაუნდის ფარგლებში, ქართული მხარის მიერ განიხილებოდა ოკუპირებულ რეგიონებში არსებული მძიმე ჰუმანიტარული მდგომარეობა და ადამიანის უფლებების უხეში დარღვევები, მათ შორის საქართველოს დელეგაცია მნიშვნელოვან აქცენტს აკეთებდა დღის წესრიგის ერთ-ერთ უმთავრეს საკითხზე - ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლებში უსაფრთხო და ღირსეულ დაბრუნებაზე“, - განაცხადა მინისტრმა.

მან ისაუბრა საანგარიშო წლის განმავლობაში განხორციელებულ აქტივობებსა და მიღებულ შედეგებზე,

„2022 წელს გამყოფი ხაზის გასწვრივ სოციალურ-ეკონომიკური, ინფრასტრუქტურული, სასოფლო-სამეურნეო, ჯანდაცვითი, საგანმანათლებლო მიმართულებებით განხორციელებული და მიმდინარე პროექტების საერთო ღირებულებამ 85 მილიონ ლარს მიაღწია. ამასთან, გაზიფიცირებულია სოფლების უმეტესობა; გათბობით უზრუნველყოფილია 14 000-ზე მეტი ოჯახი; განხორციელებული პროექტების ფარგლებში აშენდა და რეაბილიტაცია ჩაუტარდა 3 სკოლის შენობას და 10 საბავშვო ბაღს. 2021-22 სასწავლო წელს სახელმწიფომ 2400-მდე სტუდენტს დაუფინანსა უმაღლესი განათლება, რისთვისაც 5 მილიონი ლარი გამოიყო. არსებული საგანმანათლებლო პროგრამის განვითარების და უკეთ ორგანიზების მიზნით, განათლების და მეცნიერების სამინისტროს ინიციატივითა და ძალისხმევით, პარტნიორ უწყებებთან ერთად კომისიამ დაამტკიცა კონკრეტული ცვლილებების გეგმა, რის შედეგადაც შეიქმნა სპეციალური პლატფორმა, სადაც სტუდენტებს 2022-23 სასწავლო წლის დაფინანსების მისაღებად პირველად მიეცათ ელექტრონულად რეგისტრაციის საშუალება“.

შერიგებისა და ჩართულობის პოლიტიკის ფარგლებში განხორციელებული ღონისძიებების შეჯამებისას მან აღნიშნა, რომ ამ ფარგლებში არსებითი პროგრესის მიღწევა დიდწილად დამოკიდებულია ოკუპირებულ რეგიონებში შექმნილ ვითარებაზე, ადგილობრივი მოსახლეობის შესაძლებლობაზე, სურვილის და ინტერესის შემთხვევაში დაუბრკოლებლად ისარგებლონ მათთვის გახსნილი პერსპექტივებით.

„აღმართული კედლები და მავთულხლართები, ფიზიკური კედლები და სხვა ბარიერები ადგილობრივ მოსახლეობაზე განხორციელებული წნეხი შეიძლება დაუძლეველ წინაღობად იქნეს მიჩნეული ნდობის მშენებლობის და შერიგების გზაზე, რისთვისაც ადამიანებს შორის კომუნიკაცია ერთ-ერთი აუცილებელი წინაპირობაა.

თეა ახვლედიანმა სამოქალაქო თანასწორობისა და ინტეგრაციის სახელმწიფო პოლიტიკის თაობაზე და იმ შედეგებზე ისაუბრა, რაც მიღწეულია შარშან დამტკიცებული ახალი ათწლიანი სახელმწიფო სტრატეგიის სამოქმედო გეგმის პირველი ორწლიანი ციკლის განხორციელების ფარგლებში.

მისი თქმით, გრძელდებოდა ძალისხმევა ეთნიკური უმცირესობებით მჭიდროდ დასახლებულ რეგიონებში სახელმწიფო ენის ცოდნის დონის ამაღლების, ისევე როგორც ხარისხიან განათლებაზე ხელმისაწვდომობის გაზრდის მიზნით.

შერჩეული იყო 30 საჯარო სკოლა და მათ ბაზაზე ახალი „პროფესიული უნარების განვითარების პროგრამების“ ამოქმედებამ საცხოვრებელ ადგილთან ახლოს პროფესიული განათლების მიღების დამატებითი, უნიკალური შესაძლებლობა შექმნა.

სკოლამდელი და ზოგადი განათლების ხელმისაწვდომობის გაზრდისა და სასწავლო გარემოს გაუმჯობესების მიზნით, ქვემო ქართლის, სამცხე-ჯავახეთისა და კახეთის რეგიონებში მიმდინარეობს საგანმანათლებლო დაწესებულებების რეაბილიტაცია-მშენებლობის პროექტები.

„ეთნიკური უმცირესობების წარმომადგენლებით მჭიდროდ დასახლებული რეგიონების მოსახლეობის სოციალურ-ეკონომიკურ მდგომარეობაზე პოზიტიურად აისახა მრავლობითი ინფრასტრუქტურული პროექტები შიდა გზების, საირიგაციო და სასმელი წყლის სისტემების, გარე განათების რეაბილიტაციის, სკვერებისა და სპორტული სივრცეების მოწყობის და სხვა მიმართულებებით. ეთნიკური უმცირესობებით მჭიდროდ დასახლებული სამივე რეგიონის შესაბამის მუნიციპალიტეტებში 170-ზე მეტი ინფრასტრუქტურული პროექტი განხორციელდა, 130 მლნ. ლარამდე ჯამური ღირებულებით“, - განაცხადა თეა ახვლედიანმა.

მან ასევე ისაუბრა იმის თაობაზე, რომ სახელმწიფო პოლიტიკის განხორციელების ანგარიშვალდებულების თვალსაზრისით, სახელმწიფო მინისტრის აპარატის ხელმძღვანელობითა და კოორდინაციით, მიმდინარე წელს ეროვნულ უმცირესობათა დაცვის ჩარჩო კონვენციის (FCNM) მე-4 ციკლის ფარგლებში მომზადდა და ევროპის საბჭოს წარედგინა სახელმწიფო ანგარიში, რომელშიც კომპლექსურად აისახა ბოლო 5 წლის განმავლობაში ქვეყანაში ეთნიკურ უმცირესობათა დაცვის მიმართულებით არსებული ვითარება და შექმნილი შესაძლებლობები.

„სამოქალაქო ინტეგრაცია მრავალ განზომილებიანი პროცესია, რაც მოითხოვს საზოგადოების თითოეული წევრის, როგორც უმცირესობის, ასევე უმრავლესობის მხრიდან სრულფასოვან მონაწილეობას, მხარდაჭერასა და ქმედით თანადგომას. ისევე როგორც პასუხისმგებლობების გაზიარებას. სწორედ ასე ვხედავთ სტრატეგიის განხორციელების ეფექტიანობას და ამ მიმართულებით საზოგადოების კონსოლიდაციის დიდი იმედი გვაქვს“, - განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა.

​ანგარიშის დასრულების შემდეგ, თეა ახვლედიანმა დეპუტატების შეკითხვებსაც უპასუხა.