გიორგი ვოლსკი: არავითარი საკვირველება იმაში არ მდგომარეობს, რომ კიევის ცენტრში, ოდესაში ან ნებისმიერ სხვა ქალაქში სააკაშვილს კიდევ გააჩნდეს არადეკლარირებული ქონება, ისევე როგორც ფულადი რესურსები

გიორგი ვოლსკი, გიული ალასანიას მიერ ლიზა იასკოსა და მიხეილ სააკაშვილისთვის ქონების გადაფორმების შესახებ გავრცელებულ ინფორმაციას ეხმაურება. პარლამენტის პირველი ვიცე-სპიკერის თქმით, გიული ალასანიას მილიონობით გადაფორმებული ქონება აქვს, რომელიც სააკაშვილმა თავის ხელისუფლებაში ყოფნის პერიოდში გადასცა და ახლა ალასანია მიხეილ სააკაშვილთან დაკავშირებულ „პიარ- კამპანიაში უშველებელ თანხებს იხდის“.

„სიახლე არაფერი არ არის, სააკაშვილს გააჩნია ქონება, მის ოჯახს გააჩნია ქონება, დედამისს გააჩნია მილიონობით გადაფორმებული ქონება, რომელიც სააკაშვილმა თავის ხელისუფლებაში ყოფნის პერიოდში გადასცა მას და უშველებელ თანხებს იხდიან პიარ-კამპანიისთვის, რომ სააკაშვილი მსხვერპლად გამოიყვანონ. არავითარი საკვირველება იმაში არ მდგომარეობს, რომ კიევის ცენტრში, ოდესაში ან ნებისმიერ სხვა ქალაქში სააკაშვილს კიდევ გააჩნდეს არადეკლარირებული ქონება, ისევე როგორც ფულადი რესურსები და არა მარტო იმ სივრცეში, რასაც უკრაინა და საქართველო ჰქვია. ამის რეალური დოკუმენტები თუკი დადებული იქნება, ვალდებულება არსებობს, რომ გამოძიება დაიწყოს და შეიძლება სისხლის სამართლის საქმეც აღიძრას ამ საკითხთან დაკავშირებით”, - განაცხადა გიორგი ვოლსკიმ.

„ქრონიკის“ ინფორმაციით, ერთი მილიონი გრივნა და ძვირადღირებული, ნახევარ მილიონიანი ბინა კიევის ცენტრში, მიხეილ სააკაშვილის ნოტარიული თანხმობით, გიული ალასანიამ სააკაშვილისა და ლიზა იასკოს შვილს, ჟასმინ იასკოს გადაუფორმა. ბინა, კიევში ბულვარნო, კუდრიავსკას ქუჩაზე მდებარეობს. გიული ალასანია ამბობს რომ ინფორმაცია არ აქვს.