პაველ ჰერჩინსკი: დისკუსიის დროს სპიკერისგან საქართველოში „უცხოური გავლენის გამჭვირვალობის შესახებ“ კანონის არსებობის აუცილებლობის შესახებ სხვადასხვა არგუმენტი მოვისმინეთ

ეს არ იყო მარტივი დისკუსია. ჩვენი მხრიდან საკმაოდ ღიად დავაფიქსირეთ, რომ აღნიშნული ინიციატივა ევროკავშირის ფასეულობებსა და ნორმებთან შეუთავსებელია. კიდევ ერთხელ აღვნიშნეთ, რომ ინიციატივა 12 პრიორიტეტიდან სულ მცირე ორს ეწინააღმდეგება, - ამის შესახებ ევროკავშირის ელჩმა საქართველოში პაველ ჰერჩინსკიმ შალვა პაპუაშვილთან შეხვედრის შემდეგ განაცხადა, რომელზეც ევროკავშირის წევრი ქვეყნების ელჩებთან ერთად „უცხოური გავლენის გამჭვირვალობის“ შესახებ კანონპროექტებზე იმსჯელეს.

„დისკუსიის დროს სპიკერისგან საქართველოში აღნიშნული კანონის არსებობის აუცილებლობის შესახებ სხვადასხვა არგუმენტი მოვისმინეთ. ამ თემასთან დაკავშირებით საუბარი მომავალშიც გაგრძელდება. როგორც ვხვდები, ეს ჯერ კანონპროექტიც არ არის. ეს მხოლოდ ინიციატივაა და, რა თქმა უნდა, ჩვენ პროცესს გულისყურით ვადევნებთ თვალყურს. იმედს ვიტოვებთ, რომ აღნიშნული ინიციატივა კანონად არ იქცევა. ჩვენი აზრით, სამოქალაქო საზოგადოება, არასამთავრობო ორგანიზაციები და თავისუფალი მედია დემოკრატიის ხერხემალია, ამიტომ ძლიერი სამოქალაქო საზოგადოების და თავისუფალი მედიის არსებობა ყველას ინტერესებში უნდა შედიოდეს“, - აღნიშნა ელჩმა.

პარლამენტის თავმჯდომარე შალვა პაპუაშვილი ევროკავშირის ელჩს და ევროკავშირის წევრი ქვეყნების ელჩებს უცხოური გავლენის გამჭვირვალობისა და უცხოელი აგენტების რეგისტრაციის აქტის თაობაზე კანონპროექტებთან დაკავშირებით შეხვდა.

14 თებერვალს „ხალხის ძალამ“ საქართველოს პარლამენტში „უცხოური გავლენის გამჭვირვალობის შესახებ“ კანონპროექტი დააინიცირა. ამერიკის სახელმწიფო დეპარტამენტის სპიკერმა, ნედ პრაისმა პარლამენტში წარდგენილი კანონპროექტი დაიწუნა და მასში გარკვეული საფრთხე დაინახა.

21 თებერვალს კი „ხალხის ძალის“ ლიდერმა დიმიტრი ხუნდაძემ განაცხადა, რომ მოძრაობა კანონპროექტის ალტერნატიულ ვერსიასაც წარადგენს, რომელიც ამერიკული კანონის ზუსტი თარგმანი იქნება. კანონპროექტის ორივე ვერსია ვენეციის კომისიაში გაიგზავნება.