ირაკლი ქადაგიშვილი: კანდიდატის სტატუსი საქართველოს არ მიენიჭა, ევროკომისიის შუალედური დასკვნით კი აღმოჩნდა, რომ არა მარტო უკრაინასა და მოლდოვაზე, არამედ ევროკავშირის მთელ რიგ ქვეყნებზე წინ ვართ რიგი მონაცემებით

კანდიდატის სტატუსი საქართველოს არ მიენიჭა, როცა ევროკომისიის შუალედური დასკვნით აღმოჩნდა, რომ არა მარტო ამ ორ ქვეყანაზე [უკრაინა, მოლდოვა], არამედ ევროკავშირის მთელ რიგ ქვეყნებზე წინ ვართ მთელი რიგი მონაცემებით, - ამის შესახებ საპარლამენტო უმრავლესობის წევრმა ირაკლი ქადაგიშვილმა „ქრონიკასთან“ განაცხადა.

დეპუტატი გამოეხმაურა საქართველოში ევროკავშირის ელჩის, პაველ ჰერჩინსკის განცხადებას, რომ კანდიდატის სტატუსის მოპოვება დამოკიდებულია პროგრესზე.

„რა არის ქვეყნის პროგრესი - როგორია ქვეყანაში საკანონმდებლო ბაზა, როგორია ქვეყანაში კანონის აღსრულების პრაქტიკა და ა.შ. ანუ, გაზომვადი რაღაცები. მაგრამ, მაგალითად რომელიღაცა ოპოზიციურ პარტიას შეიძლება არ მიაჩნდეს, რომ ქვეყანა სწორი მიმართულებით ვითარდება და მას ეს რიტორიკა ჰქონდეს, რომ ქვეყანაში ყველაფერი შავბნელი ფერებით არის გამოხატული და ამას საკუთარი ტელევიზიებით გადმოსცემდეს. შეიძლება თავისი ოთხი ტელევიზიის მეშვეობით ილაპარაკოს, რომ ქვეყანაში დემოკრატია არ არსებობს და ამას ამბობდნენ ქვეყანაში უმდიდრესი ადამიანები, რომლებიც ამავდროულად არიან პოლიტიკური პარტიების ლიდერები. [ამბობენ] ქვეყანაში დემოკრატია არ არსებობსო, მაგრამ ქვეყნის წამყვანი ბიზნესმენები არიან და საკუთარი პარტიები გააჩნიათ. ამ ქვეყანაში როგორც არასდროს, ისეთია მედიის თავისუფლება, ყველა ბიზნესმენს, ყველა მდიდარ ადამიანს შეუძლია საკუთარი პარტია, საკუთარი ტელევიზია ჰქონდეს. გაქცეული ადამიანები შეიძლება ქვეყნის გარედან აფინანსებდნენ ტელევიზიებს და ა.შ. ჩვენ ქვეყანაში შეიძლება იძახონ, რომ სასამართლო არ არსებობს, მაგრამ სტრასბურგის სასამართლოს ყველა გადაწყვეტილება ამბობს, რომ თურმე ჩვენი სასამართლოს გადაწყვეტილებები არის ევროპის ძალიან მაღალი სტანდარტების შესაბამისი. ამიტომ ეს ყველაფერი არის მხოლოდ პოლიტიკური რიტორიკის საკითხი, ფაქტები კი სხვა რამეზე მეტყველებს, მათ შორის იმაზე - ბევრ ქვეყანას რომ არ გააჩნია, ისეთი საარჩევნო კოდექსი მივიღეთ.

კანდიდატის სტატუსი საქართველოს არ მიენიჭა, როცა ევროკომისიის შუალედური დასკვნით აღმოჩნდა, რომ არა მარტო ამ ორ ქვეყანაზე [უკრაინა, მოლდოვა], არამედ ევროკავშირის მთელ რიგ ქვეყნებზე წინ ვართ მთელი რიგი მონაცემებით. ამას ვერ ხსნიან, ამიტომ ადგილი რჩება აქ პოლიტიკური რიტორიკისთვის. იქნება თუ არა პროგრესი - ამ პოლიტიკური რიტორიკის ნაწილია, რეალური შეფასებები კი ხელის გულზე დევს. ამ კუთხით საქართველოს მართლაც ეკუთვნის კანდიდატის სტატუსის მიღება“, - განაცხადა ქადაგიშვილმა.