შალვა პაპუაშვილი მოსამართლეების სანქცირებაზე: ეს არის ძალიან ცუდ დროს მიღებული ცუდი გადაწყვეტილება

საქართველო არის ამერიკის შეერთებული შტატების ხანგრძლივი სტრატეგიული პარტნიორი. ჩვენი ჯარისკაცები ამერიკელ ჯარისკაცებთან ერთად მხარდამხარ, სხვადასხვა ცხელ წერტილში იბრძოდნენ, იქნებოდა ეს ერაყი თუ ავღანეთი. ჩვენმა ხალხმა სისხლი გაიღო იმისთვის, რომ საერთაშორისო მშვიდობა უზრუნველყოფილი ყოფილიყო ჩვენს ამერიკელ პარტნიორებთან ერთად და ჩვენს საერთაშორისო პარტნიორებთან ერთად, - ამის შესახებ საქართველოს პარლამენტის თავმჯდომარემ, შალვა პაპუაშვილმა აშშ-ის ელჩთან, კელი დეგნანთან შეხვედრის შემდეგ განაცხადა.

მისი თქმით, მოსამართლეების დასანქცირება ძალიან ცუდ დროს მიღებული ცუდი გადაწყვეტილება.

„საქართველო-ამერიკის პარტნიორობას 30 წელი ჩვენ პატიოსნად ვატარებთ და ყოველთვის, სადაც საჭიროა ჩვენი თანადგომა და პარტნიორობა, ჩვენ ამას ვიჩენთ. მათ შორის იმით, რომ ავღანეთში საქართველო ამერიკის შემდეგ იყო ყველაზე დიდი კონტრიბუტორი ერთ სულ მოსახლეზე გადათვლით. როდესაც ავღანეთიდან უკან იხევდა ალიანსის ძალები, საქართველომ უმოკლეს დროში ლოგისტიკურად მოაწესრიგა ავღანეთიდან ალიანსის ძალების უკან დახევა და ამან უზრუნველყო, რომ პროცესი ყოფილიყო ორგანიზებული. ამ გადმოსახედიდან და ამ პარტნიორობის გათვალისწინებით, რომელსაც საქართველო აჩვენებს ამერიკის შეერთებულ შტატებს, რა თქმა უნდა, ეს ნაბიჯი არ არის ისეთი, როგორც იქცევიან პარტნიორები, როდესაც ხდება ჩვენი მოქალაქეების და მოსამართლეებისთვის იარლიყების მიწებება, რომ ისინი არიან კორუმპირებულები. ამავე დროს, იმ კონტექსტში, რომ არ ხდება არავითარი მტკიცებულების წარმოდგენა და ხდება მითითება რაღაც საჯარო წყაროებზე, რაც ყველამ ვიცით და რა არის ამ საჯაროში სპეციფიკური წყარო ვერავინ გაიგო. რა თქმა უნდა, ამასთან დაკავშირებით ჩემი იმედგაცრუება გამოვთქვი. ეს არის ძალიან ცუდ დროს მიღებული ცუდი გადაწყვეტილება. რაც უნდა ყოფილიყო საფუძველი თუ მიზანი ამ გადაწყვეტილების, ჩვენ ვხედავთ ვინ სარგებლობს ამით, სარგებლობს რადიკალიზმის გაღვივება, პოლარიზაციის გაღრმავება და საქართველოს ევროპული ინტეგრაციისთვის წყლის შეყენება. ამიტომ ძალიან იმედგამაცრუებელია ასეთი გადაწყვეტილება“, - განაცხადა შალვა პაპუაშვილმა.