შალვა პაპუაშვილი: დეოლიგარქიზაციის კანონი არ ეხება კონკრეტულ ადამიანებს და წინასწარ დასახელება ვინ უნდა იყოს და ვინ არა, შეუძლებელია

დეოლიგარქიზაციის კანონი არ ეხება კონკრეტულ ადამიანებს და წინსწრებით დასახელება ვინ უნდა იყოს და ვინ არა, შეუძლებელია, - ამის შესახებ ჟურნალისტებს პარლამენტის თავმჯდომარემ შალვა პაპუაშვილმა განუცხადა.

„ჩვენ ვნახეთ გუშინ კომიტეტებმა განიხილეს „ნაციონალური მოძრაობის“ ინიციატივა. აღმოჩნდა, რომ თავად ოპოზიცია მხარს უჭერს დეოლიგარქიზაციის კანონს, ანუ იმ ვერსიას, რომელიც მათ ჰქონდათ. თურმე, პრობლემა არ აქვთ იმასთან დაკავშირებით, რომ დეოლიგარქიზაცია სპეციალური კანონით მოწესრიგდეს. გამოდის, რომ ამ საკითხზე უკვე არსებობს პარლამენტში თანხმობა, მათ შორის, ოპოზიციის მხრიდან, რომ დეოლიგარქიზაციის სპეციალური კანონი არის მისაღები ფორმა საკითხის რეგულაციისთვის.

რაც შეეხება პროექტს, ყველამ ვნახეთ რა რეკომენდაციებიც იყო ჩამოსული. ამ რეკომენდაციების სრული გათვალისწინებით იმსჯელებს კომიტეტი და ეს პროექტი ამ რეკომენდაციების და შენიშვნების გათვალისწინებით ხელახლა გადაეგზავნება ვენეციის კომისიას. ამ მხრივ, ვფიქრობ, რომ პრობლემა არ იქნება“, - აღნიშნა პარლამენტის თავმჯდომარემ.

პაპუაშვილი მიიჩნევს, რომ იმ რეკომენდაციების გათვალისწინებით, რომელიც ვენეციის კომისიისგან არის, საქართველოს პარლამენტი ძალიან კარგ, დახვეწილ პროექტს შეიმუშავებს.

„მე ვფიქრობ, რომ ეს კანონი გავრცელდება ადამიანებზე, ადამიანები კი არსებობენ სხვადასხვა პოლიტიკური გემოვნების. მთავარი არის ის, რომ გავრცელდეს ყველა ადამიანზე, ეს გულისხმობს თანასწორობას. ეს კანონი არ ეხება კონკრეტულ ადამიანებს, ეს ეხება ადამიანებს, რომლებიც აკმაყოფილებენ რაღაც კრიტერიუმებს. ამ კრიტერიუმებზე უნდა შევთანხმდეთ. წინსწრებით დასახელება ვინ უნდა იყოს და ვინ არა, შეუძლებელია“, - განაცხადა პაპუაშვილმა.

იურიდიულ საკითხთა კომიტეტი, დღევანდელ სხდომაზე, მმართველი გუნდის მიერ ინიცირებულ „დეოლიგარქიზაციის შესახებ“ კანონპროექტის კორექტირებულ ვარიანტს განიხილავს.