გირჩი ხელისუფლებას ნარკოპოლიტიკაზე მუშაობის შეჩერებისთვის აკრიტიკებს

"გირჩი" ხელისუფლებას ნარკოპოლიტიკის შემოშავების პროცესის შეწყვეტის გამო აკრიტიკებს. ამის შესახებ მოძრაობის ლიდერი ზურაბ ჯაფარიძე ვიდეომიმართვას ავრცელებს.

ჯაფარიძის თქმით, 21 სექტემბერს საქართველოს პარლამენტმა 1 თვით, 21 ოქტომბერს დაგეგმილ ადგილობრივი თვითმმართველობის არჩევნებამდე, მუშაობა შეწყვიტა. ეს ნიშნავს, რომ არჩევნებამდე არ მოხდება ნარკოპოლიტიკის ეროვნული პლატფორმის მიერ შემუშავებული საკანონმდებლო ცვლილებების მიღება და "არსებული იდიოტური და მავნებლური ნარკოპოლიტიკის თუნდაც ოდნავი ლიბერალიზაცია", - ამბობს ჯაფარიძე.

„ამასთან დაკავშირებით გვინდა, განვაცხადოთ: დაახლოებით 4 თვის განმავლობაში, ბევრისთვის გაუგებარი მიზეზით „გირჩი“ არ აქტიურობდა ნარკოპოლიტიკასთან დაკავშირებულ საკითხებზე. ამის მიზეზი იყო ნარკოპოლიტიკის ეროვნული პლატფორმის მიერ მომზადებული კანონპროექტი და ნარკოპოლიტიკაზე მომუშავე სხვადასხვა ჯგუფის იმედიანი მოლოდინი (ჩვენი აზრით, საფუძველშივე ფუჭი), რომ ხელისუფლება ოქტომბრის არჩევნებამდე გადმოდგამდა შემხვედრ ნაბიჯს და შეარბილებდა ნარკოპოლიტიკას.

იმის გამო, რომ „ოცნების“ საპარლამენტო წარმომადგენლობის წევრთა ნაწილი ნარკოპოლიტიკის ცვლილებით დაინტერესებულ სამოქალაქო საზოგადოების ერთ ნაწილს არწმუნებდა, თითქოს „გირჩის“ აქტიურობა ხელს უშლიდა მათ თანაგუნდელების დარწმუნებაში, რომ ნარკოპოლიტიკის ცვლილება მნიშვნელოვანია, ჩვენ გადავწყვიტეთ არ მიგვეცა „ქართული ოცნების“ ერთი შეხედვით სწორი პოზიციის მქონე დეპუტატებისთვის საკანონმდებლო ცვლილებებზე უარის თქმის საბაბი და ნარკოპოლიტიკაზე გამოვაცხადეთ მორატორიუმი.

„გირჩის" მორატორიუმის შედეგი არის ის, რომ ნარკოპოლიტიკა პრაქტიკულად გაქრა ქვეყნის პოლიტიკური დღის წესრიგიდან, ხოლო არჩევნებამდე 1 თვით ადრე ვიგებთ, რომ არანაირი ცვლილება ნარკოპოლიტიკის მიმართულებით არჩევნებამდე არც იგეგმება. მეტიც, ნარკოპოლიტიკის ეროვნული პლატფორმის მომზადებულ საკანონმდებლო ცვლილებებზე მთავრობამ ისეთი დასკვა დაწერა, რომ დღეს რომელიმე სამოქალაქო ჯგუფის მხრიდან რაიმე პოზიტიური ნაბიჯის მოლოდინი უკეთეს შემთხვევაში გულუბრყვილობაა, ხოლო უარეს შემთხვევაში ხელისუფლებასთან კოლაბორაცია.

მნიშვნელოვანია, რომ ადგილობრივ არჩევნებამდე „ოცნება“ დათმობაზე წავიდა არაერთ ჯგუფთან, რომლებმაც იაქტიურეს და არ შეასუსტეს წნეხი ხელისუფლებაზე. ოცნებამ დაუთმო ფაშისტური ხედვების მქონე ჯგუფებს და კონსტიტუციით კრძალავს სასოფლო-სამეურნეო მიწის მიყიდვას უცხო ქვეყნის მოქალაქეებზე; ოცნებამ დაუთმო კომუნისტური ხედვების მქონე ჯგუფებს და კონსტიტუციიდან იღებს (12 წლის შემდეგ, მაგრამ მაინც) ჩანაწერს რეფერენდუმის გარეშე გადასახადების ვერ გაზრდის თაობაზე; ოცნებამ ასევე დაუთმო ჰომოფობთა უზარმაზარ არმიას დომინანტი რელიგიური ჯგუფის თამადობით და კონსტიტუციით აპირებს განსაზღვროს ქორწინება როგორც ქალსა და კაცს შორის კავშირი.

ერთადერთი, ვინც „ოცნებამ“ წინასაარჩევნოდ გადააგდო, არიან ჩვენი ქვეყნის ის მოქალაქეები, რომლებიც წლებია ნარკოპოლიტიკის ლიბერალიზაციას ელოდებიან. და ამის მიზეზია სასიკეთო ცვლილებების მოლოდინში ხელისუფლებაზე წნეხის შესუსტება, თუ არა სრულიად მოხსნა. ხელისუფლებამ, პროგრესულად პოზიციონირებადი რამდენიმე პარლამენტარისა და სამოქალაქო საზოგადოების ნაწილის დახმარებით, წარმატებით მოახერხა ილუზიის შექმნა, თითქოს არჩევნებამდე აპირებდა ნარკოპოლიტიკის შეცვლას.

ჩვენ ვიცოდით, რომ ეს იყო ტყუილი, თუმცა მაინც ავირჩიეთ მორატორიუმის გზა, რათა კანონპროექტის ჩავარდნა ვინმეს გირჩის პასუხისმგებლობად არ მოენათლა...

ჩვენი აზრით განსაკუთრებული ცოდნა ან პოლიტიკური ალღო არ სჭირდება იმის გააზრებას, რომ არჩევნების შემდეგ ხელთ აღარ გვექნება ხელისუფლებაზე ზეწოლის მნიშვნელოვანი ბერკეტი და ვიქნებით სრულიად სხვა რეალობაში, მნიშვნელოვნად გაუარესებული პოზიციით. მეტიც, წარსული მრავალწლიანი გამოცდილების გათვალისწინებით, ახლავე შეიძლება ითქვას, რომ არჩევნების შემდეგ, მაღალი ალბათობით, სამართალდამცავი სტრუქტურები ნარკოპოლიტიკის მიმართულებით კიდევ უფრო გააქტიურდებიან და ეს აქტიურობა აღარ იქნება შემოფარგლული ფონიჭალაში საჩვენებელი სპეცოპერაციებით. სიმძიმის ცენტრი გადაინაცვლებს მომხმარებლებზე, მიაკითხავენ ყველას, და, როგორც ეს უკვე არაერთხელ მომხდარა წინა წლებში ჩატარებული არჩევნების შემდეგ, ფულით აზღვევინებენ იმ რბილ დამოკიდებულებას, რომელიც ახლა, წინასაარჩევნოდ იგრძნობა. სიცოცხლით სავსე ქალაქის ნაცვლად მივიღებთ კრიმპოლითა და საპროცესოებით სავსე ქალაქს. საკანონმდებლო ცვლილებების მიღება არჩევნებამდე ჯერ კიდევ შესაძლებელია. ამისთვის საჭიროა 2 დღიანი საგანგებო საპარლამენტო სესია და 40-მდე არასამთავრობო ორგანიზაციის მიერ მომზადებული კანონპროექტების დაჩქარებული წესით განხილვა. ერთადერთი რას ამისთვის საჭიროა - ესაა პოლიტიკური ნება. ..

გირჩი ამთავრებს მორატორიუმს და გეგმავს ყველას ახლობლების მოკითხვას, ვინც წინ დაგვიდგება არსებული არაადამიანური ნარკოპოლიტიკის ცვლილებისთვის ბრძოლის გზაზე", - აცხადებს ზურაბ ჯაფარიძე "გირჩის" სახელით.

20 სექტემბერს არასამთავრობო ორგანიზაციებმა ხელისუფლებას ნარკოპოლიტიკის სფეროში ქმედითი ნაბიჯების გადადგმისკენ მოუწოდეს. ნარკოპოლიტიკის ეროვნულ პლატფორმის წევრები აცხადებენ, რომ პოლიტიკური დაპირებების პარალელურად, ამ კუთხით ცვლილებები ოქტომბრის თვითმმართველობის არჩევნებამდე უნდა განხორციელდეს.

26 ივლისს პარლამენტმა მესამე მოსმენით განიხილა და მხარი დაუჭირა საკანონმდებლო პაკეტს, რომლითაც მარიხუანასა და მცენარე კანაფთან დაკავშირებით კანონის ლიბერალიზაცია ხდება. 

29 ივლისს მარიხუანის მცირე ოდენობით მოხმარებისთვის პატიმრობის გაუქმებაზე ნორმა ძალაში შევიდა.