აჭარის ტელევიზიის ჟურნალისტის თქმით, თურქმა მებაჟემ ხაზი გადმოკვეთა და ხელები გადაუგრიხა

დღეს დილით, სარფის საბაჟო გამშვებ პუნქტზე დაპირისპირება მოხდა. საზღვარზე შეკრებილი ადამიანები ამბობდნენ, რომ თურქმა მებაჟეებმა ისინი გაურკვეველი მოტივით უკან მოაბრუნეს და რამდენიმედღიანი დეპორტაცია გაუკეთეს. 

"ლიბერალის" ცნობით კი თურქმა მებაჟემ საზღვარი გადმოკვეთა და "აჭარის ტელევიზიის" ჟურნალისტს ხელები გადაუგრიხა.

"თურქი მებაჟეებიდან ერთ-ერთმა მათგანმა ხაზი გადმოკვეთა და ხელები გადამიგრიხა, პირადობის დამადასტურებელი მოწმობა და მობილური წამართვა, ცდილობდნენ, რომ ჩემი ოპერატორი გადაეყვანათ და შეეყვანათ მათ მხარეს, რომ უკვე მათი იურისდიქცია ყოფილიყო ძალაში, დამიწყეს  ცემა", - აცხადებს "აჭარის ტელევიზიის" ჟურნალისტი ჯენი კვანტალიანი.

"გადავედით, გავიარეთ ქართული მხარე და როდესაც ნეიტრალიტეტში დავდექით, ქართული პოლიცია გვეუბნებოდა, რომ არ გადაგვეღო ნეიტრალურ ტერიტორიაზე, დავემორჩილეთ და არ ვიღებდით, ამ დროს „თურქმა მებაჟეებმა დაიწყეს ჩვენი ოპერატორისთვის კამერის ჩამორთმევა, ნეიტრალურ მხარეს ვიყავით და ცდილობდნენ, ოპერატორი თურქულ მხარეს გადაეყვანათ, ერთადერთი რაც მომაფიქრდა, როდესაც შევხედე, რომ იძაბებოდა სიტუაცია, ჩავრთე Facebook ლაივი", - ამბობს ჯენი კვანტალიანი.

თურქი მებაჟეების ქმედებები ყოველდღიურად გადამსვლელებმა ინციდენტის შემდეგაც გააპროტესტეს და სარფის საბაჟო გამშვები პუნქტის გადაკეტვაც სცადეს.

თურქეთის მხარეს საბაჟო გამშვები პუნქტის მშენებლობა მიმდინარეობს, რის გამოც, თურქეთის საბაჟო გამშვებ პუნქტზე ექვსის ნაცვლად ერთი გასასვლელი და შემოსასვლელი მუშაობს, რაც რიგებს იწვევს.