ირაკლი ზარქუა: რაც არასამთავრობო სექტორისთვის არის გამიზნული, პოლიტიკური დღის წესრიგის ინტერესებს არ უნდა ემსახურებოდეს

რაც არასამთავრობო სექტორისთვის არის გამიზნული და სულ სხვა მიზანს ემსახურება, პოლიტიკური დღის წესრიგის ინტერესებს არ უნდა ემსახურებოდეს, როგორც ამას ხელმოცარული პოლიტიკური ორგანიზაციები თუ ე.წ. ლიდერები აკეთებენ, - ამის შესახებ საპარლამენტო უმრავლესობის წევრმა ირაკლი ზარქუამ განაცხადა.

„სწორია ბატონი შალვა, დაგვიანებული თუ არ არის. უნდა გადაიხედოს, აუდიტი უნდა დაინტერესდეს ამ პროცესით, რასთან გვაქვს საქმე. თუ კანონმდებლობაში გვაქვს ხარვეზი, კი ბატონო, შემოვიდეს ინიციატივით ან ჩვენ შევალთ ინიციატივით და ეს გამოსწორდება. ის რაც არასამთავრობო სექტორისთვის არის გამიზნული და სულ სხვა მიზანს ემსახურება, პოლიტიკური დღის წესრიგის ინტერესებს არ უნდა ემსახურებოდეს, როგორც ეს ხელმოცარული პოლიტიკური ორგანიზაციები თუ ე.წ. ლიდერები აკეთებენ“, - აღნიშნა ზარქუამ.

საქართველოს პარლამენტის თავმჯდომარის შალვა პაპუაშვილის თქმით, ყალბი ორგანიზაციების და მაქინაციების მეშვეობით ხდება უცხოური ფულის ინვესტირება ქართულ პოლიტიკაში. მისივე თქმით, ბოლო პერიოდში გამოაშკარავდა ასეთი სქემები „გირჩის“, „დროას“, „ევროპული საქართველოსა“ და სხვა პარტიების შემთხვევაში. პაპუაშვილის განცხადებით, მნიშვნელოვანია, რომ ამ საკითხით აუდიტის სამსახური დაინტერესდეს.