ირაკლი კობახიძე: კოლეგებმა რადიკალური ოპოზიციიდან ლიბერალური ფაშიზმის მეთოდები გამოიყენეს, უხეშად ხელყვეს თავისუფალი მანდატის პრინციპი, მათი ეს წარმატება ძალიან ხანმოკლე იქნება

კოლეგებმა რადიკალური ოპოზიციიდან ლიბერალური ფაშიზმის მეთოდები გამოიყენეს და უხეშად ხელყვეს თავისუფალი მანდატის პრინციპი, - ამის შესახებ პარტია „ქართული ოცნების“ თავმჯდომარემ ირაკლი კობახიძემ განაცხადა. მისი თქმით, მათი ეს წარმატება ძალიან ხანმოკლე იქნება.

„მოხარული ვართ, რომ უკვე აირჩა იუსტიციის უმაღლეს საბჭოში სამი წევრი და მათ დააგროვეს 90-ზე მეტი ხმა. ჩვენ გვქონდა მსგავსი ტიპის მოცემულობა სახალხო დამცველის არჩევის დროს და მოგეხსენებათ, მიუხედავად იმისა, რომ არავითარი კითხვის ნიშანი არ არსებობდა ლევან იოსელიანის კეთილსინდისიერებასთან დაკავშირებით, კომპეტენციასთან, მიუკერძოებლობასთან, ამის მიუხედავად, არათუ არ დაუჭირა რადიკალურმა ოპოზიციამ მხარი იოსელიანის კანდიდატურას, პირიქით, წარმოებდა ბულინგი ოპოზიციიდან იმ ქალი დეპუტატების წინააღმდეგ, რომლებმაც დაუჭირეს მხარი ლევან იოსელიანის კანდიდატურას. მიზეზი იყო ის, რომ რადიკალური ოპოზიცია ყველაფერს აკეთებს ჩვენი ქვეყნისთვის კანდიდატის სტატუსის არმისაღებად. დღესაც ამის გამოვლინება იყო, ეს იყო მორიგი ტესტი.

მადლობას გადავუხდი, სახელების დასახელების გარეშე, იმ ოპოზიციონერ დეპუტატებს, რომლებმაც მხარი დაუჭირეს შესაბამის კანდიდატურებს, მხარი დაუჭირეს ქვეყნისთვის კანდიდატის სტატუსის მიღებას. ეს იყო პრინციპულად მნიშვნელოვანი. გაგრძელდება პროცედურა და იმედი გვაქვს, საბოლოო ჯამში, მოვახერხებთ იუსტიციის უმაღლეს საბჭოში ხუთივე წევრის არჩევას.

დღეს ჩვენმა ოპოზიციონერმა კოლეგებმა რადიკალური ოპოზიციიდან ლიბერალური ფაშიზმის მეთოდები გამოიყენეს და მათ უხეშად ხელყვეს ის პრინციპი, რასაც ჰქვია თავისუფალი მანდატის პრინციპი. ისინი უხეშად წავიდნენ კანდიდატის სტატუსის, კონსტიტუციური პრინციპების წინააღმდეგ, თუმცა ეს ყველაფერი არის ძალიან ხანმოკლე, როგორც ლიბერალური ფაშიზმის მეთოდები არის ხანმოკლე წარმატებით დამახასიათებელი, ასევე იგივე შეეხება იმ მეთოდებს, რომლებიც მათ დღეს გამოიყენეს სხდომათა დარბაზში. ძალიან ხანმოკლე იქნება მათი ეს წარმატება“, – განაცხადა ირაკლი კობახიძემ.

პარლამენტმა იუსტიციის უმაღლესი საბჭოს არამოსამართლე სამი წევრი აირჩია. ოპოზიციის მიერ პლენარული სხდომის პროტესტის ნიშნად დატოვების გამო, კენჭისყრის პროცესი შეჩერებულია.