ალექსანდრე რაქვიაშვილი: პარლამენტში შშმ ბავშვების გამოყენებით პოლიტიკური „პროტესტი“ ყოვლად მიუღებელი და ამორალური იყო, უნდა არსებობდეს რაღაც ზღვარი, რომელიც არ უნდა გადავლახოთ

პარლამენტში შშმ ბავშვების გამოყენებით პოლიტიკური „პროტესტი“ ყოვლად მიუღებელი და ამორალური იყო, – ამის შესახებ „გირჩის“ წევრი ალექსანდრე რაქვიაშვილი სოციალურ ქსელში წერს, რითაც პარლამენტის სხდომათა დარბაზში დღეს მომხდარ ინციდენტს ეხმაურება.

„დღეს ამის გამო იყო ჩხუბი პარლამენტში. ოღონდ, არა ბანერის გამო. ეს ქალი შემოყვა შშმ ბავშვებს (ალბათ, მშობელი იყო). გამოფენაცაა დღეს პარლამენტში დაუნის სინდრომზე. ხოდა, ეს პოლიტიკური „პროტესტი“ ამ ბავშვების გამოყენებით იყო ყოვლად მიუღებელი და ამორალური. უნდა არსებობდეს რაღაც ზღვარი, რომელიც არ უნდა გადავლახოთ. არც ამ ამბის ისე გაშუქებაა სწორი, გეგონება „ქოცებს რუბლები მიაყარეს“. აშკარად სხვა რაღაც მოხდა პარლამენტში და არაფერი, რაც მოსაწონი შეიძლება ყოფილიყო“, – წერს ალექსანდრე რაქვიაშვილი.

პარლამენტის სასესიო დარბაზში დღეს ინციდენტი მოხდა. შეზღუდული შესაძლებლობის მქონე ერთ-ერთი ბავშვის მშობელმა სხდომის დროს დარბაზში რუსული რუბლები გადაყარა, რასაც დეპუტატებს შორის დაპირისპირება მოჰყვა.