შალვა პაპუაშვილი: 30 წლის შემდეგ, გერმანიას კვლავ შეუძლია ისტორიული მისიის შესრულება და ევროკავშირის კანდიდატი ქვეყნის სტატუსის საქართველოსთვის მინიჭებით, ჩვენს ქვეყანაში მშვიდობისა და კეთილდღეობის განმტკიცება

ჩვენთვის დიდი პატივია ბერბელ ბასის მიღება, განსაკუთრებით, იმის გათვალისწინებით, რომ საქართველოს დამოუკიდებლობის აღდგენის დღიდან გერმანიას გამორჩეული როლი ჰქონდა და აქვს ჩვენი ქვეყნის ინსტიტუციურ და სოციალურ-ეკონომიკურ გარდაქმნაში. გერმანიის პოლიტიკამ და მხარდაჭერამ კონკრეტული შედეგები მოიტანა - დღეს საქართველო არის სახელმწიფო, რომელმაც უზარმაზარ პროგრესს მიაღწია დემოკრატიული ინსტიტუტების და საზოგადოების მშენებლობაში. აღნიშნულისთვის მადლობას მოვახსენებთ გერმანიას და მის ხალხს, - ამის შესახებ შალვა პაპუაშვილმა გერმანიის ფედერაციული რესპუბლიკის ბუნდესტაგის პრეზიდენტთან გამართულ ერთობლივ ბრიფინგზე განაცხადა.

საქართველოს პარლამენტის თავმჯდომარემ აღნიშნა, რომ ბასის ვიზიტი ისტორიული მოვლენაა და გერმანიას საქართველოს სუვერენიტეტისა და ტერიტორიული მთლიანობის მხარდაჭერისთვის მადლობა გადაუხადა.

„ჩვენ ასევე მადლიერები ვართ გერმანიის მხრიდან საქართველოს სუვერენიტეტისა და ტერიტორიული მთლიანობის მხარდაჭერისთვის. ჩვენი ქვეყნის დღევანდელი სახელმწიფოებრიობა და სუვერენიტეტი გერმანიის და მისი მსგავსი მეგობრების და პარტნიორების დამსახურებაცაა.

მოხარულები ვართ, რომ ბოლო პერიოდში გვაქვს ორ ქვეყანას შორის პოლიტიკური დიალოგის გაღრმავების აქტიური დინამიკა. გასული წლის დეკემბერში, გერმანიის ბუნდესტაგის პრეზიდენტის მოწვევით, მე თავად ვიყავი გერმანიაში ვიზიტად; 2023 წლის მარტში გერმანიის საგარეო საქმეთა ფედერალური მინისტრი ანალენა ბერბოკი გვსტუმრობდა თბილისში; ერთი თვის წინ საქართველოს პრემიერ-მინისტრს ბერლინში ჰქონდა დიალოგი გერმანიის კანცლერთან; დღეს კი საქართველოს პარლამენტში გვაქვს ბუნდესტაგის პრეზიდენტის მასპინძლობის პატივი. უმაღლესი დონის ეს ურთიერთშეხვედრები და ვიზიტები არც არის გასაკვირი - იგი ასახავს იმ მჭიდრო ხალხთაშორის ურთიერთობებს, ასევე, თანამშრომლობას კულტურის, ეკონომიკის, თავდაცვის, განათლების, ტრანსპორტის, ენერგეტიკის, მეცნიერების და სხვა სფეროებში, რომელიც საუკუნეების მანძილზე ამდიდრებდა და განამტკიცებდა ჩვენს მეგობრობას და პარტნიორობას.

გერმანიასა და საქართველოს შორის კავშირები დგას დემოკრატიის და მშვიდობის საერთო ღირებულებებზე. გერმანიას და საქართველოს შორის კავშირები ასევე საერთო მიზნებსა და ინტერესებს ემსახურება. ქართველი და გერმანელი ჯარისკაცები ავღანეთის მაზარ-ი-შარიფის ბაზაზე წლების მანძილზე ერთმანეთს მხარს უმაგრებდნენ და იბრძოდნენ ამ ფასეულობებისა და ინტერესებისთვის, ევროპის მშვიდობისა და უსაფრთხოებისთვის, გერმანიის და საქართველოს მოსახლეობის კეთილდღეობისთვის.

დღეს, საქართველო კვლავ ისტორიულ პროცესში იმყოფება. 30 წლის წინ გერმანიამ გადამწყვეტი როლი ითამაშა საერთაშორისო თანამეგობრობაში საქართველოს სრულუფლებიან წევრად დამკვიდრების საქმეში. 30 წლის შემდეგ, გერმანიას კვლავ შეუძლია ისტორიული მისიის შესრულება და ევროკავშირის კანდიდატი ქვეყნის სტატუსის საქართველოსთვის მინიჭებით, ჩვენს ქვეყანაში მშვიდობისა და კეთილდღეობის განმტკიცება. იმედი გვაქვს, რომ გერმანია იქნება ევროკავშირში საქართველოს ინტეგრაციის მხარდაჭერის პროცესის ლიდერი.

შეხვედრაზე სწორად აღნიშნულ საკითხებზე გვქონდა საუბარი. დღეს და ხვალ გვექნება სხვა შესაძლებლობაც, რომ უფრო დეტალურად განვიხილოთ ორ ქვეყანას შორის არსებული ურთიერთობების დღის წესრიგი და საპარლამენტო თანამშრომლობის გაღრმავებით ხელი შევუწყოთ ჩვენი მოქალაქეებისთვის სასარგებლო ინიციატივების წამოწყებას.

კიდევ ერთხელ მადლობას ვუხდი ბუნდესტაგის პრეზიდენტს ჩამობრძანებისთვის. დარწმუნებული ვარ, საქართველოში მისი ვიზიტი საქართველოსა და გერმანიას შორის პარტნიორობის ახალი ეტაპის დასაწყისი იქნება“, - განაცხადა პაპუაშვილმა.