საიამ ჰიჯაბის აკრძალვის ფაქტზე სახალხო დამცველს მიმართა

საიამ სახალხო დამცველს  თელავის მუნიციპალიტეტის სოფელ ყარაჯალის საჯარო სკოლის ორი მუსლიმი მოსწავლე გოგოს სახელით მიმართა. ინფორმაციას საია ავრცელებს.

საქმე ეხება ყარაჯალის საჯარო სკოლის დირექტორის მხრიდან მოსწავლე გოგოსთვის სკოლის ტერიტორიაზე მუსლიმური რელიგიური სიმბოლოს ჰიჯაბის ტარების აკრძალვას.

საიამ სახალხო დამცველის აპარატში ამ სკოლის შინაგანაწესის 23-ე მუხლის მე-6 პუნქტი გაასაჩივრა, რომელიც მოსწავლისაგან ითხოვს სკოლაში ქუდის, კეპის, ბენდენას და თავსახვევის ტარების აკრძალვას.

საიას მიაჩნია, რომ შინაგანაწესის ეს ჩანაწერი ეწინააღმდეგება ,,დისკრიმინაციის ყველა ფორმის აღმოფხვრის შესახებ“ კანონის მე-2 მუხლის მე-3 პუნქტს, რომლითაც აკრძალულია ირიბი დისკრიმინაცია (ფორმით ნეიტრალური და არსით დისკრიმინაციული დებულების დაუშვებლობა).

"საია თვლის, რომ თავსახვევის ამკრძალავი სკოლის შინაგანაწესი ნეიტრალურია რელიგიური სიმბოლოების მიმართ, თუმცა ამ დებულების აღსრულების პრაქტიკა არათანაბარ მდგომარეობაში აყენებს მუსლიმ გოგონას 
ქრისტიან თანატოლებთან შედარებით. შინაგანაწესი მსგავს აკრძალვას არ აწესებს მოსწავლის მიერ საჯარო სკოლაში ქრისტიანული ჯვარის ტარებასთან დაკავშირებით.

,,დისკრიმინაციის ყველა ფორმის აღმოფხვრის შესახებ“ კანონის მე-4 მუხლის თანახმად, ყველა დაწესებულებამ, მათ შორის სოფელ ყარაჯალის საჯარო სკოლამ თავისი შიდა რეგულაციები შესაბამისობაში უნდა მოიყვანოს ანტიდისკრიმინაციულ კანონმდებლობასთან.

განცხადებით საია თხოვს სახალხო დამცველს, რეკომენდაციით მიმართოს თელავის მუნიციპალიტეტის სოფელ ყარაჯალის საჯარო სკოლის დირექტორსა და სამეურვეო საბჭოს, რომ შეიცვალოს შინაგანაწესი, რათა მუსლიმ მოსწავლეებს შესაძლებლობა მიეცეს ატარონ ჰიჯაბი", - წერია საიას განცხადებაში.

26 სექტემბერს თელავის მუნიციპალიტეტის სოფელ ყარაჯალის სკოლის დირექტორმა სკოლაში მე-7 კლასელი მოსწავლე არ შეუშვა. ამის მიზეზი ის იყო, რომ მას თავსაბურავი, იგივე ჰიჯაბი ეკეთა. მოსწავლის მამამ, ასტანოვ თაჰირმა დირექტორი რელიგიის თავისუფლების შეზღუდვაში დაადანაშაულა და განათლების სამინისტროს რეაგირებისკენ მოუწოდა.

სამინისტრო ამ ფაქტს წერილობით გამოეხმაურა.