პრემიერი: რამდენიმე თვის წინ პრეზიდენტმა საჯაროდ თქვა, რომ საქართველო არ იმსახურებდა შარშან კანდიდატის სტატუსს. გაუმართლებელი იქნებოდა ჩემი მხრიდან ამ განცხადების მოსმენის შემდეგ მისთვის გარკვეული უფლებამოსილების დელეგირება

სამწუხაროდ, პრეზიდენტმა არ გაითვალისწინა მთავრობის მიერ გაგზავნილი უარი და დემონსტრაციულად დაარღვია კონსტიტუცია. მოგეხსენებათ, კონსტიტუცია განმარტავს, რომ საშინაო და საგარეო პოლიტიკას ახორციელებს საქართველოს მთავრობა. თუ პრეზიდენტს მიანიჭებს მთავრობა უფლებამოსილებას, მხოლოდ ამ შემთხვევაში შეუძლია პრეზიდენტს, რომ ეს უფლებამოსილება შეასრულოს და განახორციელოს, - ამის შესახებ პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.

„დაახლოებით 1 თვის წინ გავუგზავნე ოფიციალური უარი ამ ვიზიტებზე და აქვე მინდა ჩვენი არგუმენტაცია კიდევ ერთხელ მოვიყვანო. კარგად გახსოვთ, რომ რამდენიმე თვის წინ ქალბატონი პრეზიდენტი გამოვიდა საჯაროდ და თქვა, რომ საქართველოს ხელისუფლება არ ასრულებს 12 რეკომენდაციას. ასევე, მან თქვა ყველაზე მეტად შემაშფოთებელი რამ, რომ საქართველო არ იმსახურებდა შარშან კანდიდატის სტატუსს.

ამას როცა ადამიანი მოისმენს, არა მარტო მთავრობის მეთაური, მინისტრები, პარლამენტის წევრები და მმართველი გუნდის წევრები, ბუნებრივია, მეტი მტკიცებულება არ გვჭირდება, რომ უბრალოდ სანდოობა დაიკარგოს. რა თქმა უნდა, ჩვენ არ გვქონდა არავითარი მოტივაცია, მეტსაც ვიტყვი, გაუმართლებელი იქნებოდა ჩემი მხრიდან ამ განცხადების მოსმენის შემდეგ მისთვის გარკვეული უფლებამოსილების დელეგირება.

სამწუხარო არის ის, რომ საქართველოს პრეზიდენტი დემონსტრაციულად არღვევს კანონს. ამ დროს ჩვენ უნდა ვიყოთ კანონის დამცველები და მივცეთ მაგალითი სხვებს. ამიტომ, მმართველი პარტიის გადაწყვეტილება იყო აბსოლუტურად გამართლებული“, - განაცხადა პრემიერმა.

მმართველი გუნდი პრეზიდენტის იმპიჩმენტისთვის ხელმოწერებს დღეს, საპარლამენტო უმრავლესობის სხდომაზე შეაგროვებს. პროცედურების დასაწყებად საჭიროა 50 ხელმოწერა. შემდეგ „ქართული ოცნება“ საკონსტიტუციო სასამართლოს მიმართავს.