გია ცაგარეიშვილი: ჩვენ მომავალშიც დავიცავთ საქართველოს კონსტიტუციას და ვფიქრობ, ეს არის ქართულ პოლიტიკაში ჩვენი საქმიანობის ქვაკუთხედი

ჩვენ მომავალშიც დავიცავთ საქართველოს კონსტიტუციას და ვფიქრობ, ეს არის ქართულ პოლიტიკაში ჩვენი საქმიანობის ქვაკუთხედი, - ამის შესახებ გია ცაგარეიშვილმა „ქრონიკაში“ განაცხადა. ფრაქცია „ქართული ოცნების“ თავმჯდომარის მოადგილე იუსტიციის სამინისტროს მიერ ოთარ ფარცხალაძის შესახებ გავრცელებულ განცხადებასაც გამოეხმაურა.

„ეს მოსალოდნელიც იყო. მოჩქარეს მოუგვიანდესო, ასე ემართება ზოგიერთ ჩემს კოლეგას. მიმდინარეობს 2 წარმოება - იუსტიციის სამინისტროსა და სუსში. მაგრამ აფორიაქებული აქვთ სული ამ ადამიანებს, ახლა ფიქრობენ: „ამ თემას უნდა ამოვარტყათ ჩანგალი“, ამ სიტყვის პირდაპირი მნიშვნელობით და გაცვივდნენ ქუჩაში. „არიქა, ანადგურებს საბანკო სექტორს „ქართული ოცნება“, ფეხქვეშ გათელა ჩვენი უფლებები“ და გამოხატავენ ამ აბსოლუტურად უსაგნო აღშფოთებას.

არადა ძალიან მარტივად არის საკითხი - ჩვენ ვიცავთ საქართველოს მოქალაქეებს. ეს არის ამოსავალი წერტილი ჩვენს საქმიანობაში, მათგან განსხვავებით. ჩვენ თავისუფლება მორჩილებაში კი არ გაგვიგია და ასე კი არ ვთარგმნით თავისუფლებას, პასუხისმგებლობაა ჩვენი ქვეყნის წინაშე, კონსტიტუციის დაცვის წინაშე არის უდიდესი მოვალეობა საქართველოს მოქალაქისა და მით უმეტეს პარლამენტის წევრისა და პოლიტიკოსისასა. ამ იდეით ვართ გამსჭვალულები. [მიაჩნიათ, რომ] თუ ჩვენ ჩვენს მოქალაქეებს ვიცავთ, ვართ მონები. მაგრამ ადამიანები, რომლებიც ამგვარ „თავისუფლებაში“, რომელიც უსაგნო მორჩილებაა, ეძებენ გამოსავალს, თვითონ ხდებიან თვალსა და ხელს შუა მონები და სხვებს აბრალებენ შემდეგ მონობას“, - განაცხადა ცაგარეიშვილმა.

აშშ-მა საქართველოს ყოფილ გენერალურ პროკურორს ოთარ-ფარცხალაძეს სანქციები დაუწესა. აშშ-ის სახაზინო დეპარტამენტის უცხოური აქტივების კონტროლის ოფისის ინფორმაციით, ახალი სასანქციო პაკეტის ფარგლებში სანქციები კიდევ 24 ინდივიდზე გავრცელდა, რომელთა შორისაა ოთარ ფარცხალაძე.

დღეს იუსტიციის სამინისტრომ გაავრცელა განცხადება, რომლის მიხედვითაც სახელმწიფო სერვისების განვითარების სააგენტოში დაწყებულია წარმოება ოთარ ფარცხალაძის საქართველოს მოქალაქეობის დაკარგვასთან დაკავშირებით.