მიხეილ სარჯველაძე: პრეზიდენტს და ოპოზიციას შეეძლოთ ძალიან კარგი როლის შესრულება ევროინტეგრაციის მიმართულებით, თუმცა თავიანთი ტაქტიკით, რიტორიკით ბევრწილად განაპირობეს დიდი რისკების გაჩენა საქართველოს ევროინტეგრაციის გზაზე

დამახინჯებული რეალობით ტირაჟირება გახდა მთავარი ინსტრუმენტი ოპოზიციის ხელში და სამწუხაროდ, ამას აჰყვა სალომე ზურაბიშვილიც, - ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ „ქრონიკაში“ განაცხადა.

მისი თქმით, პრეზიდენტს შეეძლო ძალიან კარგი როლის შესრულება ევროინტეგრაციის და მათ შორის, დეპოლარიზაციის მიმართულებით, ისევე, როგორც ოპოზიციასაც. თუმცა აღმოჩნდა, რომ თავიანთი არჩეული ტაქტიკით, რიტორიკით ბევრწილად განაპირობეს დიდი რისკების გაჩენა საქართველოს ევროინტეგრაციის გზაზე შემდეგ ეტაპზე გადანაცვლების მიმართულებით.

„გახსოვთ როგორ წარიმართა ეს პროცესი 2022 წლის ივნისიდან მოყოლებული, წლევანდელი წლის 8 ნოემბრამდე. მუდმივად, გაუთავებლად იყო ლაპარაკი იმაზე, რომ საქართველო ჩამორჩენილი ქვეყანაა ასოცირებულ ტრიოში. მიუხედავად იმისა, რომ ასეთი განცხადების გაკეთების არავითარი საფუძველი ობიექტურად არავის გააჩნდა. დღეს თვითონ ევროპა ამბობს, რომ დიახ, შარშან დაუშვეს შეცდომა იმიტომ, რომ მალევე გამოქვეყნდა შეფასებები ცალკეული სახელმწიფოების შეფასების შესახებ და ყველამ ნახა ის, რომ ნებისმიერი მიმართულებით, საქართველოს ბევრად შთამბეჭდავი მაჩვენებლები ჰქონდა, ვიდრე მოლდოვასა და უკრაინას. ჩვენ არ გვაქვს არც შეჯიბრის სურვილი, მაგრამ ამ გამონათების მიზნით გაკეთებულ გაცხადებებს, თითქოს საქართველო ჩამორჩენილი სახელმწიფოა, კატეგორიულად ვერ დავეთანხმებით. ყველას ღმერთმა ხელი მოუმართოს, მაგრამ ჩვენს ქვეყანას არაფერი აქვს დასაყვედრებელი, წამოსაძახებელი. ამიტომ როდესაც ამ თემებზე ვსაუბრობთ უნდა გავითვალისწინოთ, რომ დამახინჯებული რეალობით ტირაჟირება გახდა მთავარი ინსტრუმენტი ოპოზიციის ხელში და სამწუხაროდ, ამას აჰყვა სალომე ზურაბიშვილიც. ახლა, როდესაც ველოდებით 15 დეკემბერს, ოპოზიცია კვლავ ერთგულია მის მიერ არჩეული ცუდი ტაქტიკისა, რომ ხელისუფლებას მიაკრან არასწორი იარლიყები. სამწუხარო რეალობაა ასეთი ოპოზიციის ყოლა, მაგრამ ასეა“, - აღნიშნა სარჯველაძემ.