შარლ მიშელი: უნდა მივიღოთ მნიშვნელოვანი გადაწყვეტილებები ასპირანტ ქვეყნებზე, ხოლო პარალელურად, ვიმუშაოთ იმისთვის, რომ ჩვენი კავშირი იყოს მომავლისთვის შესაფერისი და მზად იყოს ახალი წევრების მისაღებად

2022 წლის 24 თებერვალი იყო გარდამტეხი მომენტი ევროპის ისტორიაში. ომის დაწყების შემდეგ ჩვენს კონტინენტზე მივიღეთ არაერთი უპრეცედენტო გადაწყვეტილება უკრაინის მხარდასაჭერად და პარალელურად ევროპის სუვერენიტეტის გასაძლიერებლად. ცხრამეტი თვის შემდეგ კიდევ ერთხელ დადგა თამამი გადაწყვეტილებების მიღების აუცილებლობა, - ამის შესახებ ევროპული საბჭოს პრეზიდენტმა შარლ მიშელმა განაცხადა. მან ევროკავშირის წევრი ქვეყნების წარმომადგენლებს კომპრომისის მიღწევისკენ მოუწოდა.

„ძალა, მონდომება და გამბედაობა სწორი არჩევანის გასაკეთებლად - დღეს ამის დროა. ჩვენ უნდა შევასრულოთ ჩვენი ვალდებულებები უკრაინის მიმართ და გავაგრძელოთ ის პოლიტიკა, რათა ვიყოთ სანდო და ძლიერი პარტნიორი. ჩვენ უნდა მივცეთ უკრაინას მუდმივი და მდგრადი პოლიტიკური, ფინანსური და სამხედრო მხარდაჭერა და კერძოდ, მივაღწიოთ შეთანხმებას, რომელიც უზრუნველყოფს 50 მილიარდი ევროს დახმარებას გრძელვადიანი სტაბილურობისთვის. ჩვენ ასევე უნდა მივაღწიოთ შეთანხმებას უკრაინასთან მოლაპარაკებების გასახსნელად, რაც აუცილებელი სიგნალია და კიდევ უფრო დააახლოებს უკრაინას ჩვენს ევროპულ ოჯახთან.

ჩვენ უნდა მივიღოთ მნიშვნელოვანი გადაწყვეტილებები სხვა ასპირანტ ქვეყნებზეც, ხოლო პარალელურად, ვიმუშაოთ იმისთვის, რომ ჩვენი კავშირი იყოს მომავლისთვის შესაფერისი და მზად იყოს ახალი წევრების მისაღებად. ახალ გამოწვევებს ახალი ვალდებულებები მოაქვს. მრავალწლიანი ფინანსური რევიზია ინტენსიურად და შეუფერხებლად წარიმართა. მე კარგად გავითვალისწინე ყველა თქვენი შეშფოთება და პრიორიტეტი და წინადადება, რომელიც ხელს შეუწყობს მაგიდის გარშემო განსხვავებული პოზიციების დაახლოებას.

როგორც ნებისმიერი კომპრომისული გადაწყვეტის შემთხვევაში, მივმართავ ყველას მზადყოფნისკენ, რათა მივაღწიოთ კომპრომისს ერთიანობისთვის. კონსენსუსის მიღწევა ნამდვილად მოითხოვს თქვენგან გადამწყვეტ ერთობლივ ძალისხმევას და ძლიერ პოლიტიკურ ვალდებულებას“, - განაცხადა მიშელმა.