წულუკიანი ომბუდსმენთან დაკავშირებით დეპუტატის კრიტიკას გამოეხმაურა

იუსტიციის მინისტრი თეა წულუკიანი უმრავლესობის დეპუტატ შოთა შალელაშვილის ბრალდებებს გამოეხმაურა. როგორც წულუკიანი ამბობს, შალელიშვილზე მხოლოდ ის იცის, რომ პარლამენტში არ დადის და ხელფასს ისე იღებს. 

"მე შალელაშვილის შესახებ ბევრი არაფერი მსმენია. მსმენია მხოლოდ ის, რასაც მედია ავრცელებდა, რომ რეალურად ის არის პარლამენტში ერთადერთი დეპუტატი, რომელიც ხელფასს იღებს და სამსახურში არ დადის. კარგია, თუ ჩემმა განცხადებამ ის სამსახურში მიიყვანა და მუშაობა დააწყებინა. ახლა მნიშვნელოვანია, რომ მომავალი სახალხო დამცველი იყოს პასუხისმგებლობიანი და მართლაც ამ პატივსაცემ საკონსტიტუციო ინსტიტუტს ვეღარავინ აკადროს ზედაპირულობა, ტყუილი და მიკერძოება. რაც შეეხება უჩა ნანუაშვილის შეფასებას, მის საქმიანობას კიდევ შევაფასებ, სანამ ის სახალხო დამცველია და მერეც, როცა აღარ იქნება. თუ მისი სურვილი იქნება, როდესაც ის ომბუდსმენი აღარ იქნება, მასთან საჯარო დებატისთვის მზად ვარ,"- განაცხადა იუსტიციის მინისტრმა. 

უმრავლესობის დეპუტატმა შოთა შალელიშვილმა დღეს დაწერა, რომ იუსტიციის მინისტრმა თეა წულუკიანმა სახალხო დამცველთან დაკავშირებით უპასუხისმგებლო განცხადება გააკეთა, როდესაც ნანუაშვილს ყველაზე უსამართლო ომბუდსმენი უწოდა. 

”მე კი ვფიქრობ, რომ ასეთი უპასუხისმგებლო განცხადება არ გაუკეთებია ,,ქართული ოცნების’’ არცერთ ლიდერს და პოლიტიკური თანამდებობის პირს. მინდა მოგიწოდოთ, რომ ყველამ პატივი სცეთ კონსტიტუციურ ორგანოებს, პატივი სცეთ თანამდებობის პირებს, რომლებიც კონსტიტუციით თუ სხვა სამართლებრივი აქტებით ახორციელებენ თავიანთ უფლებამოსილებას, მიუხედავად იმისა, ვინმეს მოსწონს თუ არა მათი სამართლებრივი შეფასებები.

ყოველთვის, ყურადღებით ვადევნებ თვალს ომბუდსმენის საქმიანობას და ანგარიშს, ასევე მისასალმებელი ფაქტია, რომ არცერთი საერთაშორისო ან ადგილობრივი ავტორიტეტული ორგანიზაციიდან არ გაჩენილა პრეტენზიები მისი მისამართით”,- განაცხადა შალელიშვილმა.

16 ნოემბერს თეა წულუკიანმა სახალხო დამცველს საქართველოში "პირველი უსამართლო ომბუდსმენი" უწოდა. მინისტრის კრიტიკა უჩა ნანუაშვილის მიერ დეკანოზის საქმეზე მომზადებულმა ანგარიშმა გამოიწვია.

სახალხო დამცველმა 15 ნოემბერს დეკანოზ გიორგი მამალაძის საქმის მონიტორინგის ანგარიში გამოაქვეყნა. ომბუდსმენის შეფასებით, მიუხედავად საქმის მიმართ მაღალი საზოგადოებრივი ინტერესისა, გამოძიება და სასამართლო პროცესები საზოგადოებრივი კონტროლის გარეშე წარიმართა.

ანგარიშს მოგვიანებით საქმის პროკურორი ჯარჯი წიკლაური ვრცელი განცხადებით გამოეხმაურა და ანგარიშს არაკომპეტენტური უწოდა. ანგარიში "პოპულიზმად" შეაფასა თბილისის საქალაქო სასამართლომ.

5 სექტემბერს მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა.