„ერთიანი ნეიტრალური საქართველო“: პროკურატურაში წარდგენილ დოკუმენტში მივუთითეთ კონსტიტუციური წყობილების ძალადობით შეცვლისაკენ მოწოდებების არაერთი მაგალითი, რაც შეიცავს სს კოდექსის 317-ე მუხლით გათვალისწინებულ დანაშაულის ნიშნებს

საზოგადოებრივი მოძრაობა „ერთიანი ნეიტრალური საქართველო“ სოციალურ ქსელში განცხადებას ავრცელებს.

„როგორც არაერთხელ განვაცხადეთ, ჩვენი ქვეყნის უსაფრთხოების, სტაბილურობისა და განვითარებისთვის ერთ-ერთ აუცილებელ პირობად მიგვაჩნია პოლიტიკური ველის ჯაშუშებისგან გაწმენდა.

აღნიშნული მიზნიდან გამომდინარე, გენერალურ პროკურატურაში შევიტანეთ განცხადება, რომელშიც ქრონოლოგიურად არის გადმოცემული იმ მოქმედებათა ჯაჭვი, რომელთა ერთობლიობა მიზნად ისახავდა საქართველოს ინტერესების ხელყოფას.

საზოგადოება წლებია თვალს ადევნებს კოორდინირებულ შეტევას ჩვენი ქვეყნის წინააღმდეგ, რომელშიც მონაწილეობას იღებენ როგორც გარე აქტორები, ასევე ოპოზიციაში ჩაბუდებული უცხოური ინტერესების გამტარებელი პირები. აშკარად იკვეთება შეთანხმებული განცხადებები, მოქმედებები, საერთო სტრატეგია საქართველოს ინტერესების დასაზიანებლად და ასევე აშკარაა ჩვენი ქვეყნის უცხოური ინტერესებისთვის გამოყენების მცდელობები.

ამ მიმართულებით ოპოზიციური პარტიების კონკრეტული წევრებისა და უცხო ქვეყნების წარმომადგენლების ქმედებებს შორის იმდენად ნათელია კავშირი, რომ ღია წყაროებზე დაყრდნობითაც კი, რთული არ არის კოორდინირებული და საერთო განზრახვით ჩადენილი დანაშაულებრივი ქმედებების გამოკვეთა, რომლებსაც საქართველოს სისხლის სამართლის კოდექსის 37-ე თავი ითვალისწინებს.

ჯაშუშური ფართო ქსელის ქმედებები შეიცავს სისხლის სამართლის კოდექსის 309-ე მუხლის პირველი ნაწილით გათვალისწინებულ დანაშაულთა ნიშნებს. ასევე, სახეზეა 315-ე მუხლით გათვალისწინებული დანაშაულის ნიშნები − შეთქმულება სახელმწიფო ხელისუფლების ხელში ჩასაგდებად.

პროკურატურაში წარდგენილ დოკუმენტში საილუსტრაციოდ მივუთითეთ კონსტიტუციური წყობილების ძალადობით შეცვლისაკენ საქვეყნოდ მოწოდებების არაერთი მაგალითი, რაც შეიცავს სისხლის სამართლის კოდექსის 317-ე მუხლით გათვალისწინებულ დანაშაულის ნიშნებს.

ყველას კარგად ახსოვს, ამერიკული ორგანიზაცია „მაკკეინის ინსტიტუტის“ მიერ შემუშავებული რეკომენდაციები, რომლის მიხედვით დღემდე სინქრონში მოქმედებენ არა მარტო ქართული დესტრუქციული ოპოზიციის წარმომადგენლები, არამედ ევროკავშირის ოფიციალური პირები, ასევე ამერიკელი ყოფილი თუ მოქმედი ბიუროკრატები. შეგახსენებთ, რომ „მაკკეინის ინსტიტუტმა“ საკუთარ სტიპენდიატად გამოაცხადა სალომე ზურაბიშვილი, რომელიც ორხელისუფლებიანობის ფორმირებას ცდილობს.

ნათელია, რომ პირთა ეს ჯგუფი მოქმედებს საქართველოს ფარგლებს გარეთ, წინასწარ შემუშავებული გეგმების მიხედვით და შესაბამისად, ისინი ეხმარებიან უცხო ქვეყნებს, უცხოეთის ორგანიზაციებს თუ უცხოეთის კონტროლს დაქვემდებარებულ ორგანიზაციებს ისეთ საქმიანობაში, რომელთა მიზანია საქართველოს სახელმწიფოებრივი ინტერესის ხელყოფა. ეს კი, საქართველოს სისხლის სამართლის კოდექსის 319-ე მუხლით გათვალისწინებული დანაშაულია.

ღია წყაროებიდანვე დასტურდება, რომ ზემოხსენებული მიზნების შესრულებისთვის, რომლებიც მიმართულია საქართველოს კონსტიტუციური წყობილების წინააღმდეგ, დღემდე გროვდება უდიდესი რაოდენობის ფინანსური სახსრები. ასევე ხდება სხვა მატერიალური რესურსების შეგროვება და მიწოდება იმის შეცნობით, რომ ისინი გამოყენებული იქნება სახელმწიფოს წინააღმდეგ მიმართულ, ხსენებულ დანაშაულთა ჩასადენად. ამის ერთ-ერთ მაგალითად გამოდგება საყოველთაოდ ცნობილი ფაქტი, როდესაც გამოძიებამ სხვადასხვა პარტიის ოფისებიდან ამოიღო ძალადობრივი აქციების მოსამარაგებლად განკუთვნილი პიროტექნიკა თუ სხვა საშუალებები. შესაბამისად, სახეზე გვაქვს საქართველოს სისხლის სამართლის კოდექსის 321(1)-ე მუხლით გათვალისწინებული დანაშაულის ნიშნები.

კარგად გვესმის, რომ შესაბამისი ბრალის წარდგენისთვის საჭიროა სისხლის სამართლის წესით მოპოვებული მტკიცებულებების ერთობლიობა კონკრეტული პირების მიმართ. შესაბამისად, სასიცოცხლოდ მნიშვნელოვანია დაიწყოს გამოძიება, ჩატარდეს ყოველმხრივი შესწავლა და მტკიცებულებების შეგროვება ზემოხსენებული მიმართულებით. შესაბამისი სისხლისსამართლებრივი სტანდარტის დაცვით, მოპოვებულ მტკიცებულებათა ერთობლიობის საფუძველზე, უნდა მოხდეს დამნაშავე პირთა პასუხისგებაში მიცემა. მათი, როგორც ჯაშუშების, სისხლისსამართლებრივი მტკიცებულებების დონეზე გამოაშკარავება იქნება უდიდესი ქართული, ეროვნული საქმე მისი პრევენციული ხასიათიდან გამომდინარე, რათა მომავალში ვერავინ გაბედოს პოლიტიკის საფარქვეშ საკუთარი ქვეყნის საწინააღმდეგო დანაშაულებრივი ქმედების ჩადენა!

ყოველივე ზემოაღნიშნულიდან გამომდინარე, მივმართეთ გენერალურ პროკურატურას, დაიწყოს გამოძიება საქართველოს სისხლის სამართლის კოდექსის 309-ე, 314-ე, 315-ე, 317-ე, 318-ე, 319-ე და 321(1)-ე მუხლებით და საქმე გამოსაძიებლად გადააგზავნოს კანონით გათვალისწინებული ქვემდებარეობით შესაბამის უწყებაში“, - აღნიშნულია განცხადებაში.

საზოგადოებრივი მოძრაობა „ერთიანი ნეიტრალური საქართველოს“ დამფუძნებლებმა გენერალურ პროკურატურაში განცხადება შეიტანეს, რითაც მათივე თქმით, ქვეყანაში მოქმედი ჯაშუშური ქსელის გამოვლენასა და მათი საქმიანობის გამოძიებას მოითხოვენ.