გიორგი გიუნაშვილის საქმე ევროპის ადამიანის უფლებათა სასამართლოში გაიგზავნება

ცხინვალის იზოლატორიდან 26 ნოემბერს გათავისუფლებული გიორგი გიუნაშვილის ინტერესებს  ევროპის ადამიანის უფლებათა დაცვის საერთაშორისო სასამართლოში არასამთავრობო ორგანიზაცია „კონსტიტუციის 42-ე მუხლი“ და მისი იურისტები არჩილ ჩოფიკაშვილი და დიმიტრი ხაჩიძე დაიცავენ.

ორგანიზაცია გიუნაშვილის დაკავების და გასამართელბის შესახებ დეტალურ ინფორმაციას ავრცელებს. "2008 წლის აგვისტომდე გიუნაშვილების ოჯახი სოფელ  დისევში ცხოვრობდა, მათ საცხოვრებელი ადგილი ომის და ოკუპაციის შემდეგ იძულებით დატოვეს. 
2016 წლის თებერვლის დასაწყისში გიუნაშვილებმა გაიგეს, რომ მათ სახლს ოკუპირებულ ცხინვალის რეგიონი (ყოფილი სამხრეთ ოსეთის ავტონომიური ოლქის ტერიტორიები) სოფელ დისევში შლიდნენ უცნობი პირები და იპარავდნენ საშენ მასალებს. 
2016 წლის 8 ივნისს, როდესაც ძმები გადავიდნენ ოკუპირებულ ტერიტორიაზე და ათვალიერებდნენ სახლს, სწორედ მაშინ გამოჩნდნენ რუსეთის ფედერაციის შეიარაღებული სამხედროები. თავისუფლების უკანონო აღკვეთისგან თავის დასაღწევად ძმებმა გაქცევა სცადეს, თუმცა  გიორგი გიუნაშვილის დააკავება მაინც მოახერხეს, ხოლო რეზო გიუნაშვილმა ტყვეობას თავი დააღწია. ძმის გატაცების შესახებ რევაზ გიუნაშვილმა  პოლიციას აცნობა. 
2017 წლის 3 თებერვალს ოჯახისათვის ცნობილი გახდა, რომ გიორგი გიუნაშვილი გაასამართლა ოკუპირებული ცხინვალის რეგიონის თვითგამოცხადებულმა სასამართლომ და მიუსაჯა 20 წლით პატიმრობა.

ადამიანის უფლებებზე სამხრეთ ოსეთის ადმინისტრაციულ ოლქში პასუხს აგებს რუსეთის ფედერაცია და ახორციელებს ოკუპირებული ტერიტორიის სრულ, ეფექტურ და რეალურ კონტროლს.
ორგანიზაცია „კონსტიტუციის 42-ე მუხლმა“ მომხდარი დანაშუალის შესახებ (გიორგი გიუნაშვილის თავისუფლების უკანონო აღკვეთა) რუსეთის ფედერაციის მთავარ პროკურატურას აცნობა და მოითხოვა შემდეგი ინფორმაცია:

1.    დაწყებულია თუ არა გამოძიება დაზარალებულ გიორგი გიუნაშვილის თავისუფლების უკანონო აღკვეთის ფაქტზე, რა კვალიფიკაციით და ვინ იძიებს სს საქმეს?
2.    მინიჭებული აქვს თუ არა გიორგი გიუნაშვილს დაზარალებულის სტატუსი შესაბამისი დადგენილებით? 
3.    რა საგამძიებო მოქმედებები ჩატარდა დღემდე პასუხისმგებელი პირების იდენტიფიცირების და სისხლის სამართლებრივი დევნისთვის?
4.    აქვს თუ არა გამოძიებას მოპოვებული ოკუპრებულ ცხინვალის რეგიონში თვითგამოცხადებული სასამართლოს განაჩენი ან, სხვა წერილობითი გადაწყვეტილება (საბრალდებო დასკვნა, პატიმრობის ბრძანება და ა.შ.) გიორგი გიუნაშვილის პატიმრობის თაობაზე. დადებით შემთხვევაში გთხოვთ გადმოგვცეთ მათი ასლი;
5.    იგეგმება თუ არა თქვენს მიერ ღონისძიებები რის შედეგადაც მოხდება გიორგი გიუნაშვილის გათავისუფლება. 

რუსეთის ფედერაციის სამხედრო პროკურატურიდან მიღებული პასუხის შესაბამისად, გიორგი გიუნაშვილი მართლაც დააკავეს რუსეთის ფედერაციის ფსბ-ს თანამშრომლებმა და დე-ფაქტო სამხრეთ ოსეთის უზენაესი სასამართლოს განაჩენით მას მიუსაჯეს 20 წლით თავისუფლების აღკვეთა."- ნათქვამია ინფორმაციაში.

"კონსტიტუციის 42-ე მუხლი" მზადაა მომავალშიც გააგრძელოს დაზარალებულ გიორგი გიუნაშვილის სამართლებრივი დახმარება.

გიორგი გიუნაშვილი წელიწადნახევრიანი უკანონო პატიმრობიდან 26 ნოემბერს გათავისუფლდა.