ვაჟა გაფრინდაშვილი: მადლობა ყველას ვინც ამ დროის განმავლობაში გვერდით მედგა

უკანონო პატიმრობიდან გათავისუფლების შემდეგ ექიმი ვაჟა გაფრინდაშვილი პირველ კომენტარს აკეთებს. 

„არ ველოდებოდი, რომ დღეს ეს მოხდებოდა. ვიცოდი, რომ 31-ში იყო სააპელაციო სასამართლო, რომელზეც მართალი რომ გითხრათ, თავს ვიკავებდი. ჯერ ემოციებით ვარ დატვირთული და ცოტა რთულია რამე გითხრათ, პირველ რიგში მადლობა მინდა ვუთხრა ყველას, ვინც გულთან მიიტანა ჩემი სიტუაცია - მთავრობას, პარლამენტს, პოლიციას უშიშროება, ჩემს ლამაზ მეუღლეს და ბრწყინვალე შვილებს და იმ ადამიანებს, ვინც ამ დროის განმავლობაში გვერდით მედგნენ“, - განაცხადა ვაჟა გაფრინდაშვილმა. მისი კომენტარის ამსახველ ვიდეოს სუსი ავრცელებს. 

მოგვიანებით, ექიმმა კომენტარი ჟურნალისტებთან უკვე გორში, შიდა ქართლის პოლიციის შენობასთანაც გააკეთა.

„ნება მომეცით, ცოტა დავწყნარდე და მერე ყველას ყველა ინფორმაციას მოგაწდვით. ასე გაერთიანებულებმა, ყველამ საქართველოს საქმე ვაკეთეთ“, - განაცხადა ვაჟა გაფრინდაშვილმა.  

ექიმი ვაჟა გაფრინდაშვილი უკანონო პატიმრობიდან გათავისუფლდა. ინფორმაციას ამის შესახებ სახელმწიფო უსაფრთხოების სამსახური ავრცელებს.

„საოკუპაციო ძალების მიერ 9 ნოემბერს დაკავებული ექიმი ვაჟა გაფრინდაშვილი გათავისუფლებულია. ამჟამად ის საქართველოს ცენტრალური ხელისუფლების მიერ კონტროლირებად ტერიტორიაზე იმყოფება“, - აღნიშნულია ინფორმაციაში.

ოკუპანტების მიერ გატაცებულ ექიმ ვაჟა გაფრინდაშვილს, რომელიც 9 ნოემბერს დააკავეს, ცხინვალის ე.წ. სასამართლომ 1 წლით და 9 თვით თავისუფლების აღკვეთა მიუსაჯა.  მომხდარს გამოეხმაურნენ ევროკავშირი, ამერიკის საელჩო, სადამკვირვებლო მისია, გერმანიის ელჩი, ლიეტუვის საგარეო საქმეთა მინისტრი.

20 დეკემბერს ვაჟა გაფრინდაშვილის ოჯახის წევრებს პრემიერმინისტრი გიორგი გახარია შეხვდა. ხელისუფლების წარმომადგენლებმა განაცხადეს, რომ საქართველო საერთაშორისო საზოგადოების მობილიზებისთვის ძალისხმევას გაზრდის.

ვაჟა გაფრინდაშვილის საკითხი ჟენევის საერთაშორისო მოლაპარაკებების 50-ე რაუნდის მთავარი თემა იყო. 

მანამდე ეს საკითხი უცხოელ პარტნიორებთან გამართული შეხვედრების დროს ერთ-ერთი მთავარი თემა იყო. საგარეო საქმეთა მინისტრმა დავით ზალკალიანმა 6 დეკემბერს, ეუთოს მოქმედ თავმჯდომარესთან მიროსლავ ლაიჩაკთან შეხვედრის შემდეგ განაცხადა, რომ არსებობს პოზიტიური ნიშნები, რომ ექიმ ვაჟა გაფრინდაშვილს მალე გაათავისუფლებდნენ. 

ამავე დღეს ეუთოში საქართველოს მეგობართა ჯგუფმა ვაჟა გაფრინდაშვილის სასწრაფოდ გათავისუფლება გავრცელებული განცხადებით მოითხოვა. გარდა ამისა, ექიმ ვაჟა გაფრინდაშვილის გატაცების საკითხი მინისტრმა ქეთევან ციხელაშვილმა ბრიუსელში გამართულ შეხვედრებზე განიხილა.